ଆମ ଓଡ଼ିଶା ଏକ କୃଷି ପ୍ରଧାନ ରାଜ୍ୟ, ଯେଉଁଠି ଅଧିକାଂଶ ଲୋକ କୃଷି ଉପରେ ନିର୍ଭରଶୀଳ । ଏଠାରେ କୃଷି ଓ ଗୋପାଳନ କରି ଜୀବିକା ନିର୍ବାହ କରନ୍ତି ଅଧିକ ରୁ ଅଧିକ ଲୋକ । ଅଧିକ ଚାଷୀ ପ୍ରାଣୀ ପାଳନକୁ ନିଜର ଜୀବିକା ରୂପେ ମଧ୍ୟ ଗ୍ରହଣ କରିଛନ୍ତି l ପରିବାର ପ୍ରତିପୋଷଣ କରିବା ସହିତ ରାଜ୍ୟ ଅର୍ଥନୀତିର ବିକାଶରେ ମଧ୍ୟ ସାମିଲ କରିଛନ୍ତି ନିଜକୁ । ଅମଳ ରୁ ଆରମ୍ଭ କରି ବିଦେଶକୁ ରପ୍ତାନି କରିବା ପର୍ଯ୍ୟନ୍ତ ଚାଷୀଙ୍କ ଭୂମିକା ଅନ୍ୟତମ l
ଗୃହପାଳିତ ପ୍ରାଣୀ ସଂପଦର ଉପଯୁକ୍ତ ପରିଚାଳନା ମଧ୍ୟ ଏକାନ୍ତ ଆବଶ୍ୟକ ହୋଇଥାଏ । ବିଭିନ୍ନ ଋତୁରେ ଚାଷୀଙ୍କ ଭୂମିକା ଅନ୍ୟତମ l ପ୍ରତି ଋତୁ ଅନୁଯାୟୀ ପ୍ରାଣୀଙ୍କ ସୁରକ୍ଷା କରିବା ଚାଷୀଙ୍କୁ ନିହାତି ଆବଶ୍ୟକ l ଅସନ୍ତୁଳିତ ପରିବେଶର ପରିବର୍ତ୍ତନରେ ବିଭିନ୍ନ ସମୟରେ ଉତ୍ପାଦନ ଏବଂ ପ୍ରଜନନ କ୍ଷମତାକୁ ପ୍ରଭାବିତ କରିଥାଏ ଗୋରୁଙ୍କର । ସାଧାରଣତଃ ଗ୍ରୀଷ୍ମଋତୁ ଏପ୍ରିଲ ମାସରୁ ଜୁନ ମାସ ପର୍ଯ୍ୟନ୍ତ ପ୍ରାଣୀଙ୍କ ଉପରେ ସର୍ବାଧିକ ଯତ୍ନଶୀଳ ନଜର ରଖିବା ଉଚିତ । ତେଣୁ ଏହି ସମୟରେ ଗୋରୁଙ୍କର ଅଧିକ ଧ୍ୟାନ ରଖିବା ଜରୁରୀ ।
ଗରମ ଅଧିକ ହେଲେ ପ୍ରାଣୀଙ୍କର ସ୍ୱାସ୍ଥ୍ୟରେ ବିଭିନ୍ନ ସମସ୍ୟା ଦେଖିବାକୁ ମିଳେ l ଥଣ୍ଡା ଜାତୀୟ ଖାଦ୍ୟ ଦେବା ସହିତ ପଶୁ ଡାକ୍ତରଙ୍କ ସହିତ ସର୍ବଦା ପରାମର୍ଶ ନେବା ଆବଶ୍ୟକ l ନିକଟସ୍ଥ ପଶୁ ଡାକ୍ତରଙ୍କୁ ଗୋରୁଙ୍କ ଚିକିତ୍ସା ପାଇଁ ଯୋଗାଯୋଗରେ ରଖିବା ଆବଶ୍ୟକ l
ଗୃହପାଳିତ ପ୍ରାଣୀଙ୍କ ଯତ୍ନ
ଗ୍ରୀଷ୍ମ ଦିନରେ ଅଧିକ ଗରମ ହେଉଥିବା ଯୋଗୁଁ ନବଜାତ ବାଛୁରୀରଙ୍କ ମୃତ୍ୟୁହାର ବଢ଼ିଥାଏ । ଅନ୍ୟପଟେ ଶରୀରରେ ରୋଗ ପ୍ରତିରୋଧକ ଶକ୍ତି ହ୍ରାସ ପାଇବା ଦ୍ଵାରା ନିମୋନିଆ, ଥନହରା, ଗର୍ଭାଶୟ ସଂକ୍ରମଣ ଭଳି ସମସ୍ୟା ପରିଲକ୍ଷିତ ହୁଏ । ଅଧିକ ତାପମାତ୍ରା ଜନିତ ଶାରୀରିକ ଅସ୍ଵସ୍ତି ଦେଖିବାକୁ ମିଳେ । ଶରୀରରେ ଏଭଳି ସମସ୍ୟା ଅନେକ ଦିନ ଧରି ଲାଗି ରହିଲେ, ପ୍ରାଣୀର ମୃତ୍ୟୁ ହୁଏ l ତେଣୁ ଗ୍ରୀଷ୍ମଋତୁରେ ଗୃହପାଳିତ ପ୍ରାଣୀଙ୍କର ଅଧିକ ଏବଂ ଉପଯୁକ୍ତ ଯତ୍ନ ନେବା ଆବଶ୍ୟକ l ଗୋରୁଙ୍କ ସ୍ଵାସ୍ଥ୍ୟର ଉଚିତ ସୁପରିଚାଳନା ନିମନ୍ତେ ନିକଟସ୍ଥ ପ୍ରାଣୀ ଚିକିତ୍ସକଙ୍କଠାରୁ ନିୟମିତ ପରାମର୍ଶ ନେବା ଉଚିତ ।
ଗ୍ରୀଷ୍ମ ଜନିତ ଗରମର ପ୍ରଭାବକୁ ହ୍ରାସ କରିବା ନିମନ୍ତେ ଗୋରୁଙ୍କ ପାରିପାର୍ଶ୍ଵିକ ପରିବେଶକୁ ସଠିକ ପରିସ୍କାର ଓ ସ୍ୱଚ୍ଛ ରଖନ୍ତୁ । ଗୁହାଳ ସର୍ବଦା ପୂର୍ବ-ପଶ୍ଚିମ ଦିଗରେ ହେବା ଆବଶ୍ୟକ ହୋଇଥାଏ । କାରଣ, ଏହା ଉତ୍ତମ ବାୟୁ ଚଳାଚଳ ହେବାରେ ସହାୟକ ହୋଇଥାଏ । ଗୁହାଳର ଛାତକୁ ଧଳା ରଙ୍ଗର ପ୍ରଲେପ ଦେବା ଆବଶ୍ୟକ ଯାହା ଅଧିକ ଗରମ କରେ ନାହିଁ ତଥା ଛାତର ଉପରିଭାଗକୁ ଘାସ ବା ନଡାଦେଇ ଘୋଡ଼ାଇ ମଧ୍ୟ ରଖିବା ଉଚିତ l ଏପରି କଲେ ସୌରତାପର ପ୍ରଭାବ କମ୍ ରହେ ଗୁହାଳରେ ।
ତେବେ ଖରାଦିନରେ ଗାଈ କ୍ଷୀର ଦୁହିଁବା ପୂର୍ବରୁ ଗାଈଙ୍କ ଉପରେ ଜଳ ସିଞ୍ଚନ ଫଳପ୍ରଦ ହୋଇଥାଏ । ଖରାଦିନେ ଗୋରୁଙ୍କୁ ଅଧିକ ପରିମାଣରେ ଥଣ୍ଡା ପାନୀୟ ଦିନକୁ ୫ ରୁ ୬ ଥର ଦେବା ଆବଶ୍ୟକ । ଅନ୍ୟ ଋତୁ ଅପେକ୍ଷା ଗ୍ରୀଷ୍ମଋତୁରେ ଦୁଇଗୁଣ ଅଧିକ ପାଣି ଦେବା ଜରୁରୀ । ଅଧିକ ଗୋରୁଙ୍କୁ ବାହାରେ ଛାଡିବା ଠିକ ନୁହେଁ । ଆବଶ୍ୟକ ସ୍ଥଳେ ସୂର୍ଯ୍ୟାସ୍ତ ପରେ ଗୋରୁଙ୍କୁ ପଡିଆକୁ ନିଆଯାଇପାରେ। ସେହିପରି ଖରାଦିନେ ପ୍ରାଣୀଙ୍କ ଖାଦ୍ୟ ଅଭ୍ୟାସରେ ପରିବର୍ତ୍ତନ ଆବଶ୍ୟକ ।
ସାଧାରଣତଃ ଆପଣ ଯଦି ଗୋରୁ ପାଳନ କରୁଛନ୍ତି ତେବେ ତନ୍ତୁଜାତୀୟ ନଡ଼ା, କୁଟା, ଘାସ ଇତ୍ୟାଦି ଏବଂ ଏହା ସହିତ ଶସ୍ୟ ଜାତୀୟ ଦାନା, ଚୋକଡ଼, ଚୁନି ଇତ୍ୟାଦି ଖାଇବାକୁ ଦେବା ଆବଶ୍ୟକ । ଖାଦ୍ୟ ସହିତ ଆପଣ ଆବଶ୍ୟକ ମୁତାବକ ଖାଦ୍ୟସାର ଓ ଖଣିଜଲବଣ ମଧ୍ୟ ଦିଅନ୍ତୁ l ତାପମାତ୍ରା ବୃଦ୍ଧିଜନିତ ଶାରୀରିକ ଅସ୍ଵସ୍ତିକୁ କମ କରାଯାଇପାରିବ ଏହି ସବୁ ଖାଦ୍ୟ ମାଧ୍ୟମରେ । ଗୁହାଳ ନିର୍ମାଣ ଏବଂ ପାରିପାର୍ଶ୍ଵିକ ସ୍ଥାନରେ ବୃକ୍ଷରୋପଣ କରିବା ଦ୍ଵାରା ଗୋରୁଙ୍କୁ ଗ୍ରୀଷ୍ମ ପ୍ରବାହ ଦାଉରୁ ରକ୍ଷା କରାଯାଇପାରିବ ।
ଅଧିକ ପଢ଼ନ୍ତୁ
El Nino Effect : ଓଡ଼ିଶାର ଧାନ ଉତ୍ପାଦନ ହୋଇପାରେ ପ୍ରଭାବିତ, ଜାଣନ୍ତୁ କିପରି କରିବେ ମୁକାବିଲା ?