ଏଣିକି ଗାଁ ଗାଁରେ ପହଞ୍ଚିବ ୪ଜି ମୋବାଇଲ ସେବା(4G mobile services) । ପିଲାଙ୍କ ପାଠପଢାଠୁ ନେଇ ସରକାରୀ କାମ ସବୁକିଛି ଏବେ ଅନଲାଇନରେ ହେଉଛି । ଏଥିପାଇଁ ହାଇସ୍ପିଡ ଇଣ୍ଟରନେଟର ମଧ୍ୟ ଆବଶ୍ୟକତା ରହିଛି । ଏନେଇ ପ୍ରତି ଗାଁକୁ ୪ଜି ମୋବାଇଲ ସେବା (4G mobile services) ଯୋଗାଇ ଦେବାକୁ ପ୍ରୟାସ କରୁଛନ୍ତି କେନ୍ଦ୍ର ସରକାର ।
ସରକାର ସାର୍ବଜନୀନ ସେବା କର୍ତ୍ତବ୍ୟ ପାଣ୍ଠି (ୟୁଏସଓଏଫ) ଓ ଟେଲିକମ ସେବାପ୍ରଦାନକାରୀ (ଟିଏସପି)ମାନଙ୍କ ମାଧ୍ୟମରେ ଦେଶର ଗ୍ରାମୀଣ, ଆଦିବାସୀ ଓ ପାହାଡିଆ ଅଞ୍ଚଳରେ ପର୍ଯ୍ୟାୟକ୍ରମେ ମୋବାଇଲ କଭରେଜ ଯୋଗାଇ ଦେଉଛନ୍ତି । ଏଥିପାଇଁ ୟୁଏସଓଏଫ ମାଧ୍ୟମରେ ବିଭିନ୍ନ ଯୋଜନା/ପ୍ରକଳ୍ପକୁ ଅନୁମୋଦନ ପ୍ରଦାନ କରାଯାଇଛି ।
ଦେଶର ୫ଟି ରାଜ୍ୟ ଓଡିଶା, ଆନ୍ଧ୍ରପ୍ରଦେଶ, ଛତିଶଗଡ, ଝାଡଖଣ୍ଡ ଓ ମହାରାଷ୍ଟ୍ରର ୭୨୮୭ ଗାଁରେ ୪ଜି ମୋବାଇଲ ସେବା ପ୍ରଦାନ କରିବାକୁ ଯୋଜନା ରହିଛି । ଏନେଇ କେନ୍ଦ୍ର ଯୋଗାଯୋଗ ରାଷ୍ଟ୍ରମନ୍ତ୍ରୀ ଦେବୁସିଂହ ଚୌହାନ ଲୋକସଭାରେ ଏକ ଲିଖିତ ଉତ୍ତର ମାଧ୍ୟମରେ ଏହି ସୂଚନା ପ୍ରଦାନ କରିଛନ୍ତି ।
ଏହାପୂର୍ବରୁ ଗତ ବର୍ଷ ନଭେମ୍ବରରେ ଆକାଂକ୍ଷି ଜିଲ୍ଲାଗୁଡିକରେ ମୋବାଇଲ ସେବା ବ୍ୟବସ୍ଥା ଲାଗି ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ ମିଳିଥିଲା । 5ଟି ରାଜ୍ୟର 44ଟି ଆକାଂକ୍ଷି ଜିଲ୍ଲାର ୭୨୮୭ ଗାଁକୁ 4 ଜି ସେବା ଯୋଗାଇ ଦେବାର ଲକ୍ଷ ରଖାଯାଇଥିଲା । ଏବାବଦରେ ୬,୪୬୬ କୋଟି ଟଙ୍କା ବ୍ୟୟ ଅଟକଳ ରଖିଥିଲେ ସରକାର । 18 ମାସ ମଧ୍ୟରେ ଏହି ପ୍ରକଳ୍ପ ଶେଷ କରିବାକୁ ସରକାର ପ୍ରତିଶ୍ରୁତି ଦେଇଥିଲେ ।
ଆକାଂକ୍ଷି ଜିଲ୍ଲାଗୁଡିକରେ ଏହି ମୋବାଇଲ ସେବା ପ୍ରଚଳନ ହୋଇପାରିଲେ ଆତ୍ମନିର୍ଭରଶୀଳତା ସହିତ ଜ୍ଞାନ, କୌଶଳର ବିକାଶ ଓ ଇ- ସରକାରୀ ପଦକ୍ଷେପ, ଇ-କମର୍ସ ଆଦି କ୍ଷେତ୍ରରେ ଡିଜିଟାଲ ସଂଯୋଗୀକରଣ ବୃଦ୍ଧି ପାଇବା ସହ ଆତ୍ମନିର୍ଭର ଭାରତ ଗଠନର ଲକ୍ଷ୍ୟ ସାଧିତ ହୋଇପାରିବ।