ଭାରତରେ ଆପଲର ପ୍ରଥମ ରିଟେଲ ଷ୍ଟୋର ଆଜି ମୁମ୍ବାଇରେ ବହୁତ ଜନସମାଗମ ସହିତ ଖୋଲିଛି ।ଭାରତରେ ଖୋଲାଯାଇଥିବା ଏହି ପ୍ରଥମ ଆପଲ୍ ଷ୍ଟୋର୍କୁ ସିଇଓ ଟିମ୍ କୁକ୍ ନିଜେ ଉଦ୍ଘାଟନ କରିଛନ୍ତି । କୁକ୍ ନିଜେ ଆପଲ ଷ୍ଟୋରର ଗେଟ୍ ଖୋଲି ଗ୍ରାହକମାନଙ୍କୁ ଆମନ୍ତ୍ରଣ କରିଥିଲେ । ଟିମ୍ କୁକଙ୍କୁ ଦେଖିବା ପାଇଁ ଷ୍ଟୋର ବାହାରେ ହଜାରଲ ହଜାର ଲୋକ ଏକତ୍ରିତ ହୋଇଥିଲେ ।
ଏହି ସମୟରେ କୁକ୍ ହାତ ମିଳାଇବା ସହ ସମସ୍ତଙ୍କ ଅଭିବାଦନ ଗ୍ରହଣ କରିଥିଲେ ଏବଂ କିଛି ଲୋକଙ୍କ ସହ ସେଲଫି ମଧ୍ୟ ନେଇଥିଲେ। ଏହି ଆପଲ୍ ଷ୍ଟୋର ମୁମ୍ବାଇର ବାନ୍ଦ୍ରା କୁର୍ଲା କମ୍ପ୍ଲେକ୍ସରେ ଅବସ୍ଥିତ ଜିଓ ୱାର୍ଲ୍ଡ ଡ୍ରାଇଭ୍ ମଲରେ ଖୋଲା ଯାଇଛି । ସପ୍ତାହରେ ଗୋଟିଏ ଦିନ ପାଇଁ ବି ଏହି ଷ୍ଟୋର ବନ୍ଦ ରହିବ ନାହିଁ । ଗ୍ରାହକମାନେ ସକାଳ ୧୧ଟାରୁ ରାତି ୧୦ଟା ପର୍ଯ୍ୟନ୍ତ ଏଠାରେ ସପିଂ କରିପାରିବେ ।
ମୁକେଶ ଅମ୍ବାନୀଙ୍କୁ ଭେଟିଲେ କୁକ୍-
ଆପଲର ଷ୍ଟୋର ୨୦ ହଜାର ବର୍ଗ ଫୁଟ ଉପରେ ବ୍ୟାପିଛି । ଭାରତରେ ଉପସ୍ଥିତ ଆପଲ୍ କମ୍ପାନିର ସମସ୍ତ ଉତ୍ପାଦ ବର୍ତ୍ତମାନ ଗୋଟିଏ ସ୍ଥାନରେ ମିଳିବ ।ଭାରତରେ କମ୍ପାନୀର ପ୍ରଥମ ଖୁଚୁରା ଷ୍ଟୋର୍ ଖୋଲିବାକୁ ଆସିଥିବା ଟିମ୍ କୁକ୍ ଭାରତୀୟ ବିଜନେସ୍ ଆଇକନ୍ ମୁକେଶ ଅମ୍ବାନୀଙ୍କୁ ଭେଟିଥିଲେ। କେବଳ ଏତିକି ନୁହେଁ ସେ ଫିଲ୍ମ ଅଭିନେତ୍ରୀ ମାଧୁରୀ ଦୀକ୍ଷିତଙ୍କୁ ମଧ୍ୟ ଭେଟିଥିଲେ। ସେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ସାକ୍ଷାତ କରିବା ନେଇ ଆଶା ବ୍ୟକ୍ତ କରିଛନ୍ତି । ଯଦିଓ ଏ ନେଇ କୌଣସି ଅଫିସିଆଲି ଘୋଷଣା କରାଯାଇନାହିଁ ।
ଦିଲ୍ଲୀର ସାକେତରେ ଆପଲ୍ ଷ୍ଟୋର ଖୋଲିବ:
ଆପଲ୍ ପାଇଁ ଭାରତର ବଜାର କେତେ ମହତ୍ତ୍ୱପୂର୍ଣ ତାହା ଏହାର ସିଇଓ ଟିମ୍ କୁକ୍ ନିଜେ ଏହାର ଉଦ୍ଘାଟନୀ ସମାରୋହରେ ଯୋଗ ଦେଇଥିବାକୁ ଦେଖି ଆକଳନ କରାଯାଇ ପାରେ । ଆଜି ଆପଲର ପ୍ରଥମ ଖୁଚୁରା ଷ୍ଟୋର୍ ମୁମ୍ବାଇରେ ଖୋଲିଛି ଏବଂ ଠିକ୍ ଦୁଇ ଦିନ ପରେ ଅର୍ଥାତ୍ ଏପ୍ରିଲ୍ ୨୦ରେ ଆପଲର ଦ୍ୱିତୀୟ ଖୁଚୁରା ଷ୍ଟୋର୍ ଦିଲ୍ଲୀର ସାକେତରେ ଖୋଲିବ ।ମୁମ୍ବାଇରେ ଖୋଲା ଯାଇଥିବା ଏହି ଷ୍ଟୋରରେ ୧୦୦ ଲୋକ କାମ କରିବେ ।ନବୀକରଣଯୋଗ୍ୟ ଶକ୍ତି ଉପରେ ଷ୍ଟୋର ସଂପୂର୍ଣ୍ଣ ଭାବେ କାମ କରିବ । ସୂଚନା ଅନୁସାରେ କମ୍ପାନୀ ଦ୍ୱାରା ଷ୍ଟୋର ଖୋଲିବା ଘୋଷଣା ପରେ ଗତ କିଛି ଦିନ ହେବ କ୍ରେତାମାନଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା। ଅନେକ ପ୍ରଶଂସକ ଆଜି ସକାଳ ଠାରୁ ମଲରେ ଧାଡ଼ି ବାନ୍ଧି ଦୋକାନରେ ପ୍ରବେଶ କରିଥିଲେ ।
ଆପଲ୍ ଷ୍ଟୋର୍: ଏତେ ବିଶେଷତ୍ୱ କ’ଣ?
ରାଜସ୍ଥାନରୁ ମିଳିଥିବା ଆକର୍ଷଣୀୟ ପଥରଗୁଡ଼ିକ ଷ୍ଟୋରରେ ସ୍ଥାପିତ ହୋଇଛି । ଷ୍ଟୋରରେ ୧୪ ମିଟର ଲମ୍ବା ଷ୍ଟେନଲେସ୍ ଷ୍ଟିଲ୍ ସିଡ଼ି ଅଛି ଯାହା ତଳ ମହଲାକୁ ପ୍ରଥମ ମହଲା ସହିତ ସଂଯୋଗ କରୁଛି । ଆପଲ୍ BKC ଷ୍ଟୋର୍ରେ ୧୦୦ରୁ ଅଧିକ କର୍ମଚାରୀ କାର୍ଯ୍ୟ କରିବେ ଯେଉଁମାନେ ୨୦ଟି ବିଭିନ୍ନ ଭାଷା କହିପାରୁଥିବା କର୍ମଚାରୀ ମଧ୍ୟ ରହିବେ । ଭାରତରେ ଆପଲ୍ ଗ୍ରାହକମାନେ ସମଗ୍ର ବିଶ୍ୱରେ ଥିବା ଅନ୍ୟ ଆପଲ୍ ଷ୍ଟୋରଗୁଡିକ ସହିତ ସମାନ ସେବା ପାଇପାରିବେ । ଆପଲ୍ BKC ର ଗ୍ରାହକମାନେ ଟ୍ରେଡ୍ ଇନ୍ କାର୍ଯ୍ୟକ୍ରମରେ ଅଂଶଗ୍ରହଣ କରିବାର ସୁଯୋଗ ପାଇଛନ୍ତି । କେବଳ ଏତିକି ନୁହେଁ, ଆପଲ୍ ବି.କେ.ସି ପ୍ରତିଦିନ “ଆଜି ଆପଲ୍” ଅଧିବେଶନ ଆୟୋଜନ କରିବ ଯେଉଁଥିରେ ଅନେକ ବିଶେଷଜ୍ଞ, ନିର୍ମାତା ଏବଂ ଆପଲ୍ କର୍ମଚାରୀ ଯୋଗଦେବେ।