ବିଶ୍ୱରେ ଆଗକୁ ଖାଦ୍ୟ ସଙ୍କଟ ଉତ୍କଟ ହେବାର ସମ୍ଭାବନା ଦେଖାଦେଲାଣି । ଦିନକୁ ଦିନ ଗୋଟିଏ ପରେ ଗୋଟିଏ ଦେଶ ବିଭିନ୍ନ ଖାଦ୍ୟ ଶଷ୍ୟର ରପ୍ତାନୀ ଉପରେ ରୋକ ଲଗାଉଛନ୍ତି । ଋଷ-ୟୁକ୍ରେନ ଯୁଦ୍ଧ (Russia-Ukraine War)ଯୋଗୁଁ ସପ୍ଲାଇ ଚେନ୍ ବାଧାପ୍ରାପ୍ତ ହୋଇଛି, ଯେଉଁଥିପାଇଁ ବିଶ୍ୱରେ ଖାଦ୍ୟାଭାବ ଦେଖାଦେଉଥିବା ଅର୍ଥନିତିଜ୍ଞମାନେ ଅନୁମାନ କରୁଛନ୍ତି । ଦେଶର ଚାହିଦାକୁ ଦୃଷ୍ଟିରେ ରଖି ଭାରତ ଏଥର ଚାଉଳ(Rice) ର ରପ୍ତାନୀ ଉପରେ ରୋକ ଲଗାଇବାକୁ ଯୋଜନା କରୁଥିବା ସରକାରୀ ସୂତ୍ରରୁ ସୂଚନା ମିଳିଛି ।
ଚାଉଳ ରପ୍ତାନୀ ଉପରେ କଟକଣା,ଜାଣନ୍ତୁ...
ଦେଶର ଦରଦାମ ବୃଦ୍ଧି ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର (Central Government) ପ୍ରଚେଷ୍ଠା ଜାରି ରଖିଛନ୍ତି । ଖୁବଶୀଘ୍ର ଚାଉଳ ରପ୍ତାନୀ ଉପରେ ମୋଦି ସରକାର (MODI Government) କଟକଣା ଲଗାଇ ପାରନ୍ତି ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି । ଏହା କେବେ ଠାରୁ ଲାଗୁ ହେବ ସେନେଇ କୌଣସି ଘୋଷଣା ହୋଇନାହିଁ । ଯଦି ଏପରି ହୁଏ ତେବେ, ବିଶ୍ୱର ଖାଦ୍ୟ ସୁରକ୍ଷା ଉପରେ ପ୍ରଭାବ ପକାଇବାର ଆଶଙ୍କା ରହିଛି । ନିଜ ଦେଶର ଚାହିଦା ପୂରଣ ପାଇଁ ଭାରତ ଆବଶ୍ୟକୀୟ ପରିମାଣର ଚାଉଳ ଗଚ୍ଛିତ ରଖିଛି ।
ଏସିଆ ମହାଦେଶରେ ବିଶ୍ୱର ପ୍ରାୟ ୯୦ ପ୍ରତିଶତ ଚାଉଳ ଉତ୍ପାଦନ ହୋଇଥାଏ । ଋଷ-ୟୁକ୍ରେନ ଯୁଦ୍ଧ (Russia-Ukraine War) ଯୋଗୁଁ ଚାଉଳ (Rice)ବ୍ୟବସାୟରେ ସେତେଟା ପ୍ରଭାବ ପଡିନାହିଁ । ତଥାପି ଆଗୁଆ ସତର୍କ ରହିବାକୁ ଭାରତ ସରକରା ଏହାର ରପ୍ତାନୀ ଉପରେ କଟକଣା ଲଗାଇପାରନ୍ତି । ଭାରତର ଦେଖାଦେଖି ଅନ୍ୟ ଦେଶ ମଧ୍ୟ ସମାନ ପଦକ୍ଷେପ ନିଅନ୍ତି ତେବେ ସ୍ଥିତି ସାଙ୍ଘାତିକ ହେବ । ୨୦୦୮ରେ ଭିଏତନାମ ଚାଉଳ ରପ୍ତାନୀ ଉପରେ କଟକଣା ଲଗାଇବା ପରେ ପରିସ୍ଥିତି ବଦଳି ଯାଇଥିଲା ।
ଚିନି ରପ୍ତାନୀ ଉପରେ କଟକଣା,ଜାଣନ୍ତୁ...
ଆସନ୍ତା ଜୁନ ପହିଲାରୁ ମୋଦି ସରକାର ଚିନି (SUGAR)ରପ୍ତାନୀ ଉପରେ କଟକଣା ଲଗାଇବାକୁ ଯାଉଛନ୍ତି । ଭାରତ ଚିନି ଉତ୍ପାଦନରେ ବିଶ୍ୱର ଦ୍ୱିତୀୟ ସ୍ଥାନରେ ରହିଛି । ଅକ୍ଟୋବର ୩୧ ସୁଦ୍ଧା ଚିନି ଆମଦାନୀକୁ ୧୦ ମିଲିୟନ ଟନ୍ ଯାଏଁ ସୀମିତ ରଖିବାକୁ ନିଷ୍ପତ୍ତି ନେଇଛନ୍ତି । ଚଳିତ ବର୍ଷ ଭାରତ ୩୫ ମିଲିୟନ ଟନ୍ ଚିନି ଉତ୍ପାଦନ ଲକ୍ଷ ରଖିଛି । ସେଥିରୁ ପ୍ରାୟ ୨୭ ମିଲିୟନ ଟନ ଘରୋଇ ବ୍ୟବହାର ହେବ ଆଉ ବଳକା ରପ୍ତାନୀ କରାଯିବ ବୋଲି ଆକଳନ କରାଯାଉଛି ।
ଗହମ ରପ୍ତାନୀ ଉପରେ କଟକଣା,ଜାଣନ୍ତୁ...
ଚଳିତ ମାସ ଆରମ୍ଭରୁ ଭାରତ ଗହମ (wheat) ରପ୍ତାନୀ ଉପରେ କଟକଣା ଲଗାଇଛି । ତେବେ ନିର୍ଦ୍ଦେଶନାମରେ କିଛି କୋହଳ କରାଯାଇଛି । ଅନ୍ୟଦେଶର ଅନୁରୋଧ କ୍ରମେ ଖାଦ୍ୟ ସୁରକ୍ଷାକୁ ଦୃଷ୍ଟିରେ ରଖି ଗହମ ଯୋଗାଇ ଦିଆଯିବ । କିନ୍ତୁ ଏନେଇ ଭାରତ ସରକାର ନିଷ୍ପତ୍ତି ନେବେ ।
ଚିକେନ୍ ରପ୍ତାନୀ ଉପରେ କଟକଣା,ଜାଣନ୍ତୁ...
ଭାରତ ସରକାର ଚିନି (SUGAR),ଗହମ (wheat) ଓ ଚାଉଳ (RICE)ରପ୍ତାନୀ ଉପରେ କଟକଣା ଲଗାଇବାକୁ ନିଷ୍ପତ୍ତି ନେବା ପରେ ବିଦେଶରେ ମଧ୍ୟ ପ୍ରତିକ୍ରିୟା ଦେଖିବାକୁ ମିଳିଛି । ଜୁନ ପହିଲାରୁ ମାଲେସିଆ ଚିକେନ ରପ୍ତାନୀ ବନ୍ଦ କରିବାକୁ ଯାଉଛି । ଦେଶର ଆବଶ୍ୟକୀୟ ଚାହିଦା ମେଣ୍ଟାଇବା ପାଇଁ ଏଭଳି ପଦକ୍ଷେପ ନିଆଯାଇଥିବା ମାଲେସିଆ କୃଷି ଓ ଖାଦ୍ୟମନ୍ତ୍ରୀ କହିଛନ୍ତି । ମାଲେସିଆରେ ପ୍ରତ୍ୟେକ ଦିନ ଲକ୍ଷେରୁ ଅଢେଇ ଲକ୍ଷ ଚିକେନ (chicken)ଖିଆଯାଏ । ଯଦି ସେଠାରେ chicken ରପ୍ତାନୀ ଉପରେ ବ୍ୟାନ ଲାଗିଲେ ସିଙ୍ଗାପୁର ଅଧିକ ପ୍ରଭାବିତ ହେବ ବୋଲି କୁହାଯାଉଛି ।
ତେଲ ରପ୍ତାନୀ ଉପରେ କଟକଣା,ଜାଣନ୍ତୁ...
ପ୍ରକାଶ ଥାଉ ଯେ, ଗତ ମାସରେ ପାମ୍ ଅଏଲ ରପ୍ତାନୀ ଉପରେ ଇଣ୍ଡୋନେସିଆ କଟକଣା ଲଗାଇଛି । ବିଶ୍ୱର ସର୍ବ ବୃହତ୍ତ ପାମ ଅଏଲ ରପ୍ତାନୀକାରୀ ଦେଶ ଇଣ୍ଡୋନେସିଆ ତୈଳ ରପ୍ତାନୀ ଉପରେ ପ୍ରତିବନ୍ଧକ ଲଗାଇଛି । ଅତ୍ୟାଧିକ ଚାହିଦା ଯୋଗୁ ଇଣ୍ଡୋନେସିଆରେ ପାମୋଲିନ ଏବେ ସୁନା ଦରରେ ବିକ୍ରି ହେଉଛି । ବିଶ୍ବରେ ପାମ ଅଏଲ (palm oil) ଚାହିଦାର ୫୦ ପ୍ରତିଶତ ଇଣ୍ଡୋନେସିଆ ପୂରଣ କରିଥାଏ । ଅନ୍ୟପଟେ ଇଣ୍ଡୋନେସିଆ ତେଲର ଚାହିଦା ପୂରଣ କରିବା ପାଇଁ ମାଲେସିଆ ଚେଷ୍ଟା କରୁଛି ।