କର୍ମଚାରୀଙ୍କ ଭବିଷ୍ୟ ନିଧି ସଂଗଠନ ଇପିଏଫଓ (EPFO)ପକ୍ଷରୁ ୨୦୨୧-୨୦୨୨ ବର୍ଷ ପାଇଁ ସୁଧହାର ଘୋଷଣା କରାଯାଇଛି । ସରକାର ଏଥିପାଇଁ ୮.୧ ପ୍ରତିଶତ ସୁଧ ହାର ଅନୁମୋଦନ କରିଛନ୍ତି । ଏନେଇ ଏପିଏଫଓ ପକ୍ଷରୁ ଅଫିସିଆଲ ଭାବେ ଘୋଷଣା କରାଯାଇଛି ।
ସୂଚନା ଅନୁଯାୟୀ, ଗତବର୍ଷ ଏହି ସୁଧହାର ୮.୫ ପ୍ରତିଶତ ରହିଥିବା ବେଳେ ଚଳିତ ଥର କିନ୍ତୁ ଗ୍ରାହକଙ୍କୁ ଲାଗିଛି ଜବରଦସ୍ତ ଝଟକା । EPFOର ଏହି ପଦକ୍ଷେପ ଫଳରେ କୋଟି କୋଟି ସରକାରୀ କର୍ମଚାରୀ ପ୍ରଭାବିତ ହେବେ ।
ଶୁକ୍ରବାର ଦିନ ଜାରି କରାଯାଇଥିବା EPFO କାର୍ଯ୍ୟାଳୟର ନିର୍ଦ୍ଦେଶ ଅନୁଯାୟୀ, ଶ୍ରମ ଓ ନିଯୁକ୍ତି ମନ୍ତ୍ରଣାଳୟ ଇପିଏଫ ଯୋଜନାର ପ୍ରତ୍ୟେକ ସଦସ୍ୟଙ୍କୁ ୨୦୨୧-୨୦୨୨ ପାଇଁ ୮.୧ ପ୍ରତିଶତ ସୁଧ ହାରରେ କ୍ରେଡିଟ କରିବାକୁ କେନ୍ଦ୍ର ସରକାରଙ୍କ ଅନୁମୋଦନ ସମ୍ପର୍କରେ ସୂଚନା ଦେଇଛି । ସମ୍ମତି ପାଇଁ ଅର୍ଥ ମନ୍ତ୍ରଣାଳୟକୁ ଶ୍ରମ ମନ୍ତ୍ରଣାଳୟ ଏକ ପ୍ରସ୍ତାବ ପଠାଇଛି । ସରକାରଙ୍କ ଅନୁମୋଦନ ପରେ EPFO ଆର୍ଥିକ ବର୍ଷ ପାଇଁ ସ୍ଥିର ସୁଧ ହାର କର୍ମଚାରୀଙ୍କ ଆକାଉଣ୍ଟରେ ଜମା କରିବା ଆରମ୍ଭ କରିବ ।
୧୯୭୭ -୧୯୭୮ ପରଠାରୁ ୮.୧ ପ୍ରତିଶତ EPF ସୁଧ ହାର ସର୍ବନିମ୍ନ ହୋଇଛି । ସେତେବେଳେ ଏହା ୮ ପ୍ରତିଶତ ଥିଲା । ମାର୍ଚ୍ଚ ୨୦୨୧ରେ ସେଣ୍ଟ୍ରାଲ ଟ୍ରଷ୍ଟି ବୋର୍ଡ (ସିବିଟି) ୨୦୨୦ -୨୦୨୧ ପାଇଁ EPF ଜମା ଉପରେ ୮.୫ ପ୍ରତିଶତ ସୁଧ ହାର ସ୍ଥିର କରିଥିଲା । ଅକ୍ଟୋବର ୨୦୨୧ ରେ ଏହାକୁ ଅର୍ଥ ମନ୍ତ୍ରଣାଳୟ ଅନୁମୋଦନ କରିଥିଲା । ଏହା ପରେ, EPFO ୨୦୨୦-୨୦୨୧ ପାଇଁ ଗ୍ରାହକଙ୍କ ଆକାଉଣ୍ଟରେ ସୁଧ ଆୟକୁ କ୍ରେଡିଟ୍ କରିବାକୁ ଫିଲ୍ଡ ଅଫିସଗୁଡିକୁ ନିର୍ଦ୍ଦେଶନାମା ଜାରି କରିଥିଲା ।
କର୍ମଚାରୀଙ୍କ ପ୍ରତିନିଧିତ୍ୱ କରୁଥିବା ଇପିଏଫ୍ଓର ଟ୍ରଷ୍ଟି କେ ଇ ରଘୁନାଥନ୍ କହିଛନ୍ତି ଯେ, ଯେଉଁ ଗତିରେ ଶ୍ରମ ଏବଂ ଅର୍ଥ ମନ୍ତ୍ରଣାଳୟ ସୁଧ ହାରକୁ ଅନୁମୋଦନ କରିଛନ୍ତି ତାହା ଅତ୍ୟନ୍ତ ପ୍ରଶଂସନୀୟ। କର୍ମଚାରୀମାନଙ୍କର ଅର୍ଥର ଅତ୍ୟଧିକ ଆବଶ୍ୟକତା ଥିଲା ଏବଂ ଏହା ସେମାନଙ୍କ ପିଲାମାନଙ୍କର ଶିକ୍ଷାଗତ ଆବଶ୍ୟକତା ପରି ଖର୍ଚ୍ଚ ପୂରଣ କରିବାରେ ସାହାଯ୍ୟ କରିବ ।
ପ୍ରକାଶ ଥାଉ ଯେ, ମାର୍ଚ୍ଚ ୨୦୨୦ ରେ, EPFO ପ୍ରୋଭିଡେଣ୍ଟ ଫଣ୍ଡ ଜମା ଉପରେ ସୁଧ ହାରକୁ ୨୦୧୯ -୨୦୨୦ ରେ ୮.୫ ପ୍ରତିଶତରୁ ୨୦୧୮-୨୦୧୯ ରେ ୮.୬୫ ପ୍ରତିଶତକୁ ହ୍ରାସ କରିଥିଲା । ୨୦୧୯ -୨୦ ପାଇଁ EPF ସୁଧ ହାର ୨୦୧୨-୧୩ ପରଠାରୁ ସର୍ବନିମ୍ନ ଥିଲା, ଯେତେବେଳେ ଏହାକୁ ୮.୫ ପ୍ରତିଶତକୁ କମାଇ ଦିଆଯାଇଥିଲା ।