ଆଖୁ ଗୋଟିଏ ଅର୍ଥକାରୀ ଫସଲ । ଭାରତରେ ଚିନି ଓ ଗୁଡ ଉତ୍ପାଦନ ପାଇଁ ଏହା ମୁଖ୍ୟ ଫସଲ । ଆଖୁ ଗୋଟିଏ ଅତି ଉପକାରୀ ଫସଲ ଅଟେ । ଆଖୁ ଫସଲ କ୍ଷେତ୍ରଫଳ ଓ ଚିନି ଉତ୍ପାଦନରେ ପୃଥିବୀରେ ଭାରତ ପ୍ରଥମ ସ୍ଥାନ ଅଧିକାର କରିଛି ।
ଆଖୁ ରସରୁ ଚିନି, ଗୁଡ, ଖଣ୍ଡସାରୀ ଇତ୍ୟାଦି ସୁମିଷ୍ଠ ପଦାର୍ଥ ତିଆରି ହୁଏ । ଆଖୁଛେଦା ଆଖୁରସରୁ ଗୁଡ କରିବା ପାଇଁ ଜାଳେଣୀ ସାଧାରଣ ଜାଳେଣୀ ରୂପେ ବ୍ୟବହାର କରାଯାଏ । ଏହି ଛେଦାରୁ ମଧ୍ୟ କାଗଜ, ବିଭିନ୍ନ ପ୍ରକାର ପଟା, ତିଆରି ହୁଏ । ଦେଶର ଏହି ବଢୁଥିବା ଜନସଂଖ୍ୟାର ବଢୁଥିବା ଚିନିର ଆବଶ୍ୟକତାକୁ ପୁରଣ କରିବା ପାଇଁ ୨୦୩୦ରେ ପ୍ରାୟ ୨୫ ନିୟୁତ ଟନ ଚିନିର ଆବଶ୍ୟକତା ପଡ଼ିପାରେ l ଲଗାତାର ସଘନ କୃଷି ଓ ବାରମ୍ବାର ରାସାୟନିକ ସାରର ପ୍ରୟୋଗ କାରଣରୁ ଭାରତୀୟ ଭୂମିରେ ଆବଶ୍ୟକୀୟ ପୋଷକତତ୍ତ୍ୱ ମଧ୍ୟ ହ୍ରାସ ହେବାକୁ ଲାଗିଛି l ତେଣୁ ଆଖୁର ପର୍ଯ୍ୟାପ୍ତ ପରିମାଣର ଉତ୍ପାଦନ ପାଇଁ ଭୂମିରେ ଆବଶ୍ୟକ ଥିବା ପୋଷକ ତତ୍ତ୍ୱ ଉଚିତ ମାତ୍ରାରେ ରହିବା ଜରୁରୀ l
ଭାରତରେ ପ୍ରାୟ ୩.୮ ନିୟୁତ ହେକ୍ଟର ଜମିରେ ଆଖୁଚାଷ କରାଯାଏ ଏବଂ ୨୫୪ ନିୟୁତ ଟନ ଆଖୁ ଉତ୍ପାଦିତ ହୁଏ । ହେକ୍ଟର ପ୍ରତି ହାରାହାରି ୬୬ଟନ ଆଖୁ ଉତ୍ପାଦିତ ହୋଇଥାଏ । ଉତ୍ତର ପ୍ରଦେଶ, ମହାରାଷ୍ଟ୍ର, ତାମିଲନାଡୁ, କର୍ଣ୍ଣାଟକ, ଆନ୍ଧ୍ରପ୍ରଦେଶ, ଗୁଜୁରାଟ, ହରିଆନା, ପଞ୍ଜାବ, ବିହାର, ଓଡିଶା, ମଧ୍ୟପ୍ରଦେଶ, ଆସାମ ପ୍ରଭୃତି ରାଜ୍ୟରେ ମୁଖ୍ୟତଃ ଆଖୁଚାଷ କରାଯାଏ ।
ଆମ ରାଜ୍ୟ ସମଗ୍ର ଦେଶରେ କୃଷି କ୍ଷେତ୍ରରେ ଏକ ଅଗ୍ରଣୀ ରାଜ୍ୟ ଭାବେ ସୁବିଦିତ । ଶସ୍ୟ ଜାତୀୟ ତଥା ଉଦ୍ୟାନକୃଷି ଜାତୀୟ ଫସଲ ଉତ୍ପାଦନ କରି ଚାଷୀଭାଇମାନେ ନିଜର ଜୀବିକା ପ୍ରତିପୋଷଣ କରିଥାନ୍ତି । ରାଜ୍ୟର ପ୍ରମୁଖ ଅର୍ଥକାରୀ ଫସଲ ଭାବେ ଆଖୁ ବହୁସ୍ଥାନରେ ଚାଷ କରାଯାଏ । ଆଖୁ ଫସଲରେ ସମସ୍ୟା ସୃଷ୍ଟି କରୁଥିବା ପୋକ ତନ୍ମଧ୍ୟରୁ ସଅଳ କାଣ୍ଡବିନ୍ଧା ପୋକ ଅତ୍ୟନ୍ତ କ୍ଷତିକାରକ ।
ଆଖୁ ଫସଲକୁ ଏହି ପୋକ ଶୁକ୍ଳ ଅବସ୍ଥାରେ ଆଖୁ ଗଢା ଓ ପିଲକୁ ଆକ୍ରମଣ କରେ । ଶୁକ୍ଳ ଅଣ୍ଡାରୁ ବାହାରିବା ପରେ ଆଖୁ ଗଛରେ ପ୍ରବେଶ କରି ମଝି ପତ୍ରକୁ ଖାଇ ନଷ୍ଟ କରେ । କିଛିଦିନ ପରେ ଆକ୍ରମିତ ପତ୍ରଗୁଡ଼ିକ ଶୁଖାଯାଇ ହଳଦିଆ ପଡ଼ିଯାଏ । ଏହା ଫଳରେ ଗଛ ବି ଶୁଖିଯାଏ ଓ ମରିଯାଏ ।
ନିୟନ୍ତ୍ରଣ ଜାଣନ୍ତୁ
ଜମିକୁ ଭଲ ଭାବରେ ହଳ କରିଥିଲେ ଭଲ । ଏହା ଦ୍ୱାରା ମାଟିରେ ଥିବା ପୋକର ବିଭିନ୍ନ ଅବସ୍ଥା ସୂର୍ଯ୍ୟାଲୋକ ସଂସ୍ପର୍ଶରେ ଆସି ନଷ୍ଟ ହୋଇଯାଏ । ଠିକ ଭାବେ ଜଳସେଚନ କରନ୍ତୁ । ହେକ୍ଟର ପ୍ରତି ୪ଟି ଆଲୋକ ଯନ୍ତା ବ୍ୟବହାର କରନ୍ତୁ । ଜୈବିକ ନିୟନ୍ତ୍ରଣ ପାଇଁ ହେକ୍ଟର ପ୍ରତି ୫୦୦୦୦ ଟ୍ରାଇକୋଗ୍ରାମା ପରାଶ୍ରୟା କୀଟ ୧୦ଦିନ ଅନ୍ତରରେ ୫-୬ ଥର ଛାଡ଼ିଲେ ସୁଫଳ ମିଳିଥାଏ । ଜମିକୁ ଗଭୀର ଭାବେ ଚାଷ କରିବା ପରେ ସେଥିରେ ସିଆର କରି ୧୦ରୁ ୧୫ ସେଣ୍ଟି ମିଟର ତଳେ ଆଖୁ, ଖଣ୍ଡ ପୋତନ୍ତୁ । ହୁଡ଼ା ଟେକିବା ସମୟରେ ହୁଡ଼ାକୁ ଉଚ୍ଚ କରନ୍ତୁ । ଏହାଦ୍ଵାରା ପୋକଟିର ପ୍ରାଦୁର୍ଭାବ କମିଯିବାର ସମ୍ଭାବନା ଅଧିକ ।