ଗହମରୁ ଅଟା ଓ ମଇଦା ଆଦି ପ୍ରସ୍ତୁତ ହୁଏ । ହେଲେ ଗହମରୁ ସୁକ୍ଷ୍ମ କଳାକୃତି ବି ହୋଇପାରେ, ଏହା କେବେ ଦେଖିଛନ୍ତି ? କୌତୁହଳ ଲାଗୁଛି ନା ? ତେବେ ଏଠାରେ ଆମେ ଆପଣଙ୍କୁ କହିବୁ ଗହମରୁ ପ୍ରସ୍ତୁତ କଳାକୃତି ସମ୍ପର୍କରେ...
ଚୋଟ ଛୋଟ ଗହମ ଦାନା । ଆଉ ସେଥିରେ କୋଟି କୋଟି ଓଡିଆଙ୍କ ଆରାଧ୍ୟ ମହାପ୍ରଭୁ ଜଗନ୍ନାଥ, ବଡ ଠାକୁର ବଳଭଦ୍ର ଓ ଦେବୀ ସୁଭଦ୍ରାଙ୍କ ଅଦ୍ଭୁତ କଳାକୃତି । ଶ୍ରୀଜୀଉଙ୍କୁ ଗହମରେ ରୂପ ଦେଇଛନ୍ତି ଚିତ୍ରଶିଳ୍ପୀ ପ୍ରିୟଙ୍କା ସାହାଣୀ । ଏହା ସମସ୍ତଙ୍କୁ ଆକର୍ଷିତ କରୁଛି ।
ପ୍ରିୟଙ୍କାଙ୍କ ରଙ୍ଗତୂଳୀରେ ଜୀବନ୍ତ ହୋଇଉଠେ ବିଭିନ୍ନ ନିର୍ଜୀବ ବସ୍ତୁ । ଚିତ୍ରକଳା ମାଧ୍ୟମରେ ଓଡ଼ିଶାର ସଂସ୍କୃତି ଓ ପରମ୍ପରାକୁ ଦେଶ ବିଦେଶରେ ପ୍ରଦର୍ଶନ କରିଆସୁଛନ୍ତି ପ୍ରିୟଙ୍କା । ଆଉ ଏହି କଳା ମାଧ୍ୟମରେ ସବୁ ମହଲରୁ ସେ ପ୍ରଶଂସା ମଧ୍ୟ ପାଇଛନ୍ତି ।
ନିକଟରେ ପ୍ରିୟଙ୍କା ଗହମରେ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ଚିତ୍ର ଆଙ୍କିଛନ୍ତି । ଏହି ଚିତ୍ର ସମସ୍ତଙ୍କ ମନ ଓ ପ୍ରାଣକୁ ଛୁଉଁଛି । ଚିତ୍ର ଆଙ୍କିବା ପ୍ରିୟଙ୍କାଙ୍କର ନିଶା । ନିଜର କଳା ମାଧ୍ୟମରେ ଓଡିଶାର ସଂସ୍କୃତି ଓ ପରମ୍ପରାକୁ ଅନ୍ତର୍ଜାତୀୟ ସ୍ତରରେ ପହଞ୍ଚାଇବାକୁ ଲକ୍ଷ୍ୟ ରଖିଥିବା କୁହନ୍ତି ପ୍ରିୟଙ୍କା ।