ଆଳୁ ପରେ ଏବେ ଉପରମୁହାଁ ହେଲାଣି ପିଆଜ ଦର । ଦିନେ ଦୁଇ ଦିନ ମଧ୍ୟରେ ପିଆଜ ଦର କିଲୋ ପ୍ରତି ବଢ଼ିଲାଣି ୧୦ ଟଙ୍କା । ଏବେ ମାର୍କେଟରେ ୫୦ ଟଙ୍କାରେ ବିକ୍ରି ହେଉଛି ପିଆଜ । ନାସିକରୁ ପିଆଜ ଅଳ୍ପ ଆସୁଥିବାରୁ ରାଜ୍ୟରେ ଏଭଳି ପରିସ୍ଥିତି ହୋଇଥିବା କୁହାଯାଉଛି l ଆଗକୁ ରାଜ୍ୟକୁ ପିଆଜ ଆମଦାନୀ କମି ଦର ଆହୁରି ବଢିପାରେ ବୋଲି କହିଛନ୍ତି ବ୍ୟବସାୟୀ l
ଅନ୍ୟପଟେ ଏ ପର୍ଯ୍ୟନ୍ତ ଆଳୁ ଦର ଖସିବାର ନାଁ ନେଉନାହିଁ l ବଜାରରେ ଆଳୁ ଦର ୪୦ ଟଙ୍କା ହୋଇଥିବାବେଳେ ପିଆଜ ଦର ୫୦ ଟଙ୍କା l ଏ ଖାଉଟିଙ୍କ ମଧ୍ୟରେ ଅଶାନ୍ତି ଦେଖିବାକୁ ମିଳିଛି l ରାଜଧାନୀ ଭୁବନେଶ୍ୱର ଠାରେ ପିଆଜ ଦର ୪୫ ଟଙ୍କାରୁ ୫୦ ଟଙ୍କା ପର୍ଯ୍ୟନ୍ତ ରହିଛି l ଆଳୁ ଏବଂ ପିଆଜ ହେଉଛି ଦୈନନ୍ଦିନ ଜୀବନରେ ଆବଶ୍ୟକ ପନିପରିବା ମଧ୍ୟରୁ ଅନ୍ୟତମ l
ସେପଟେ ଆଳୁ ଏବଂ ପିଆଜ ଦର ବୃଦ୍ଧି ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଅଧିକାରୀମାନେ ରାଜଧାନୀରେ ଅବସ୍ଥିତ ୟୁନିଟ-୧ ହାଟରେ ଚଢାଉ କରିଥିଲେ । ବିଭିନ୍ନ ଦୋକାନରେ ଚଢାଉ କରିବା ସହିତ ରେଟ୍ ଚାଟ୍ ଯାଞ୍ଚ କରିଥିଲେ l ଯେଉଁ ବ୍ୟବସାୟୀ ମାନେ ଅଧିକା ଦରର ବିକ୍ରି କରିବେ ଆଳୁ ଏବଂ ପିଆଜ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ହେବ ବୋଲି ଅଧିକାରୀମାନେ କଡ଼ା ଚେତାବନୀ ଦେଇଛନ୍ତି ।
ଦରଦାମର ପୁରୁଣା ଷ୍ଟିକର ଲଗାଇ ବିକ୍ରି କରୁଥିବା ବ୍ୟବସାୟୀଙ୍କୁ କାରଣ ଦର୍ଶାଅ ନୋଟିସ୍ ମଧ୍ୟ ଜାରି କରିଛି ଚଢାଉ କରୁଥିବା ଟିମ୍ । ଏ ନେଇ ନିକଟରେ ଯୋଗାଣ ମନ୍ତ୍ରୀ କହିଥିଲେ ଦର ନିୟନ୍ତ୍ରଣରେ ରହିଛି। କିନ୍ତୁ ଏବେ ସୁଦ୍ଧା ବଜାରରେ ଖାଦ୍ୟ ସାମଗ୍ରୀର ଦର ଅଧିକ ରହିଛି । ଯାହା ପାଇଁ ଲୋକେ ଆଳୁ ପିଆଜ କିଣିବାକୁ ଭୟ କଲେଣି l ତେବେ ଆଗକୁ ଯଦି ପିଆଜ ଆମଦାନୀ ରାଜ୍ୟରେ କମିବାର ଦେଖିବାକୁ ମିଳେ ପିଆଜ ଦର ଆକାଶ ଛୁଆଁ ହୋଇପାରେ l
ଅଧିକ ପଢ଼ନ୍ତୁ