ଅସ୍ତ ବ୍ୟସ୍ତ କରିସାରିଲେଣି ନାଲି ପିମ୍ପୁଡି(red ant) । ସାରା ଗାଁ ଏବେ ତ୍ରାହି ତ୍ରାହି ଡାକିଲାଣି । ପରିସ୍ଥିତି ଏମିତି ଯେ ପିମ୍ପୁଡି(red ant) ଭୟରେ ଲୋକେ ଗାଁ ଛାଡିବାକୁ ବାଧ୍ୟ ହେଉଛନ୍ତି । ପୁରୀ ଜିଲ୍ଲା ପିପିଲି ଚନ୍ଦ୍ରଦେଇପୁର(Chandradeipur)ରେ ପିମ୍ପୁଡି ଏଭଳି କଲବଲ କରୁଛନ୍ତି । ଏହାରି ମଧ୍ୟରେ ଗାଁରେ ପହଞ୍ଚିଛି ଓୟୁଏଟି ବୈଜ୍ଞାନିକ ଟିମ(OUAT team) ।
ଯାଞ୍ଚ ପରେ ବୈଜ୍ଞାନିକମାନେ ପିମ୍ପୁଡ଼ିମାନଙ୍କ ଦ୍ବାରା ଏପରି ସାମୁହିକ ଆକ୍ରମଣର କାରଣ ଜାଣିପାରି ସେମାନଙ୍କୁ ଦୂରରେ ରଖିବା ପାଇଁ ଉପାୟ ଖୋଜୁଛନ୍ତି । ଗାଁ ନଦୀ ଓ ଜଙ୍ଗଲରେ ଘେରି ରହିଛି । ସମ୍ପ୍ରତି ବନ୍ୟାରେ ନଦୀ କୂଳରେ ରହୁଥିବା ପିମ୍ପୁଡ଼ିମାନେ ଗାଁକୁ ଉପରକୁ ଉଠି ଆସିବାକୁ ବାଧ୍ୟ ହୋଇଥିବା କହିଛନ୍ତି ବୈଜ୍ଞାନିକ ।
ପ୍ରତିକାର ବ୍ୟବସ୍ଥା ବିଷୟରେ ବର୍ଣ୍ଣନା କରି ବୈଜ୍ଞାନିକମାନେ ଗ୍ରାମବାସୀଙ୍କୁ ସେମାନଙ୍କ ପରିବେଶକୁ ସଫା ରଖିବାକୁ ପରାମର୍ଶ ଦେଇଛନ୍ତି । ପିମ୍ପୁଡିମାନଙ୍କ ଉତ୍ପତ୍ତି ସ୍ଥାନ ଖୋଜି ଏହାକୁ ନଷ୍ଟ କରିବାକୁପଡିବ ବୋଲି କୁହାଯାଇଛି । ଏହାପରେ କୀଟନାଶକ ସ୍ପ୍ରେ ବ୍ୟବସ୍ଥା କରାଯିବ ।
ମୂଳ ଉଦ୍ଦେଶ୍ୟ ହେଉଛି ରାଣୀ ପିମ୍ପୁଡ଼ି ଖୋଜିବା । ଏହି ଅଞ୍ଚଳରେ ନାଲି ପିମ୍ପୁଡ଼ିଙ୍କ ଉତ୍ପାତ ପାଇଁ ରାଣୀ ପିମ୍ପୁଡି ଦାୟୀ ବୋଲି ବୈଜ୍ଞାନିକ କହିଛନ୍ତି ।
ଖବର ଅନୁଯାୟୀ, ପୁରୀ ଜିଲ୍ଲାର ପିପଲି ବ୍ଲକ ଅନ୍ତର୍ଗତ ଚନ୍ଦ୍ରଦେଇପୁର ପଞ୍ଚାୟତ ଗ୍ରାମବାସୀ ଗତ ଦୁଇ ମାସ ଧରି ନାଲି ପିମ୍ପୁଡ଼ିଙ୍କ ଆକ୍ରୋଶର ସମ୍ମୁଖୀନ ହେଉଛନ୍ତି । ଲକ୍ଷ ଲକ୍ଷ ଲାଲ ରଙ୍ଗର ପିମ୍ପୁଡ଼ି ଘର ଉପରେ ଆକ୍ରମଣ କରି ସମସ୍ତ ସମ୍ଭାବ୍ୟ ସ୍ଥାନରେ ପ୍ରବେଶ କରି ସ୍ଥାନୀୟ ଲୋକଙ୍କ ପାଇଁ ଜୀବନକୁ ଅସ୍ତବ୍ୟସ୍ତ କରିପକାଇଲେଣି ।