ରାଜ୍ୟରେ ବହୁ ଜଳସେଚନ ପ୍ରକଳ୍ପ ହେଉଛି ବୋଲି ଘୋଷଣା ହେଉଥିଲେ ହେଁ ଏବେ ସୁଦ୍ଧା ୧୭.୪୧ ଲକ୍ଷ ହେକ୍ଟର ଜମି ଅଣ-ଜଳସେଚିତ ହୋଇ ରହିଛି। ଯାହା ବର୍ଷା ଜଳ ଉପରେ ସଂପୂର୍ଣ୍ଣ ନିର୍ଭରଶୀଳ। ଚଳିତ ବର୍ଷ କେଉଁ ଜିଲ୍ଲାରେ କେତେ ଜମିରେ ଖରିଫ ଧାନ ଚାଷ ଅଗଷ୍ଟ ଶେଷ ସୁଦ୍ଧା ଆରମ୍ଭ ହୋଇନି ତାହା କୃଷି ବିଭାଗ ପାଖରେ ସୂଚନା ନାହିଁ।
ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କର ଚଳିତ ବର୍ଷ କେଉଁ ଜିଲ୍ଲାରେ କେତେ ଜମିରେ ଖରିଫ ଧାନ ଚାଷ ଅଗଷ୍ଟ ଶେଷ ସୁଦ୍ଧା ଆରମ୍ଭ ହୋଇପାରି ନାହିଁ ପ୍ରଶ୍ନର ଉତ୍ତର ଦେଇ କୃଷି ମନ୍ତ୍ରୀ ଅରୁଣ ସାହୁ କହିଛନ୍ତି ଯେ, ଅଗଷ୍ଟ ୨୮ ତାରିଖ ସୁଦ୍ଧା ବିଭିନ୍ନ ଜିଲ୍ଲାରେ ହୋଇଥିବା ଖରିଫ ଧାନ ଚାଷ ସମ୍ବନ୍ଧୀୟ ବିବରଣୀ ପ୍ରଦାନ କରିଛନ୍ତି। ହେଲେ କେଉଁ ଜିଲ୍ଲାରେ କେତେ ଜମି ଅଛି ଏବଂ କେତେ ଜମିରେ ଧାନ ଚାଷ ହୋଇନି ତାହା ସୂଚନା ଦେଇ ନାହାଁନ୍ତି । ମନ୍ତ୍ରୀ ଶ୍ରୀଯୁକ୍ତ ସାହୁ କହିଛନ୍ତି, ରାଜ୍ୟରେ ମୋଟ୍ ୬୧.୮୦ଲକ୍ଷ ହେକ୍ଟର ଚାଷ ଜମି ଅଛି। ୨୦୧୯-୨୦ ତଥ୍ୟ ଅନୁଯାୟୀ ରାଜ୍ୟରେ
୪୪.୩୮ଲକ୍ଷ ଜମିକୁ ଜଳ ସେଚନ କରାଯାଇଛି। ଅପର ପକ୍ଷେ ଅଗଷ୍ଟ ୨୮ ତାରିଖ ସୁଦ୍ଧା ୩୦ଟି ଜିଲ୍ଲାରେ ୩୩୧୩.୪୨ ହେକ୍ଟର ଜମିରେ ଖରିଫ ଧାନ ଚାଷ ହୋଇଛି। ଏଥିରୁ ସବୁଠୁ ଅଧିକ ମୟୂରଭଞ୍ଜ ଜିଲ୍ଲାରେ ୨୮୧.୦୧ ହେକ୍ଟର ଜମିରେ ଚାଷ ହୋଇଛି। ଗଜପତିରେ ସବୁଠୁ କମ୍ ୨୧.୬୭ହେକ୍ଟର ଜମିରେ ଧାନ ଚାଷ ହୋଇଛି।