ଚଳିତ ବର୍ଷ ଦେଶ ସ୍ୱାଧୀନତାର ୭୫ ବର୍ଷ ପୂର୍ତ୍ତି ହେଉଛି । ତେଣୁ ଏଥରର ସ୍ୱାଧୀନତା ଦିବସ ସମାରୋହକୁ ସ୍ମରଣୀୟ କରିବା ଲାଗି ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ସ୍ୱାଧୀନତା ଦିବସ ସମାରୋହରେ ଯୋଗ ଦେବାକୁ ଦେଶର କୋଣଅନୁକୋଣରୁ ପ୍ରାୟ ୧,୮୦୦ ସ୍ୱତନ୍ତ୍ର ଅତିଥିଙ୍କୁ ନିମନ୍ତ୍ରଣ କରାଯାଇଛି ।
ଆସନ୍ତା ୧୫ ତାରିଖରେ ନୂଆଦିଲ୍ଲୀର ଲାଲକିଲ୍ଲା ଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଜାତୀୟ ପତାକା ଉତ୍ତୋଳନ ଏବଂ ରାଷ୍ଟ୍ର ଉଦ୍ଦେଶ୍ୟରେ ଉଦବୋଧନ ସମାରୋହରେ ଏସବୁ ସ୍ୱତନ୍ତ୍ର ଅତିଥିମାନଙ୍କୁ ଦେଖିବାକୁ ମିଳିବ । ବିଶେଷ ନିମନ୍ତ୍ରିତ ଅତିଥିମାନଙ୍କ ମଧ୍ୟରେ ରହିଛନ୍ତି କେନ୍ଦ୍ର ସରକାରଙ୍କ ବିଭିନ୍ନ ଯୋଜନାର ହିତାଧିକାରୀ ତଥା ସମାଜର ବିଭିନ୍ନ ବର୍ଗର ଜନସାଧାରଣ।
ଓଡ଼ିଶାରୁ ଏମିତି ଜଣେ ହିତାଧିକାରୀ ହେଉଛନ୍ତି ନୂଆପଡ଼ା ଜିଲ୍ଲା ସୁନାବେଡ଼ା ଗ୍ରାମର ଯୁବରାଜ ଛତ୍ରିଆ। ସମୁଦ୍ର ପତ୍ତନଠାରୁ ପ୍ରାୟ ୩ହଜାର ଫୁଟ ଉଚ୍ଚତାରେ ଥିବା ସୁନାବେଡ଼ା ଅଭୟାରଣ୍ୟର ଘଞ୍ଚ ବନାନୀରେ ବସବାସ କରନ୍ତି ଆଦିମ ଜନଜାତି ଚକୋଟିଆ ଭୁଞ୍ଜିଆ । ଯୁବରାଜ ଏହି ସମ୍ପ୍ରଦାୟର ଜଣେ ଅଧିବାସୀ । ଆଦିମ ପରମ୍ପରା ଓ ପ୍ରଥାକୁ ମାନି ସେମାନଙ୍କର ଜୀବନଶୈଳୀ ଆଧୁନିକ ସମାଜଠାରୁ ଯେତିକି ଭିନ୍ନ, ସେତିକି ଦୂର । ପ୍ରଧାନମନ୍ତ୍ରୀଙ୍କ କିଷାନନିଧି ଯୋଜନାରେ ବିଭିନ୍ନ କିସ୍ତିରେ ପାଇଥିବା ୨୮ ହଜାର ଟଙ୍କାରେ ସେ ନିଜ ଜମିରେ କ୍ଷୁଦ୍ର ଶସ୍ୟ-ମିଲେଟ୍ ଚାଷ କରୁଛନ୍ତି । ମିଲେଟ୍କୁ ଏବେ ଭାରତ ସମେତ ସାରା ବିଶ୍ବରେ ପ୍ରାଧାନ୍ୟ ଦିଆଯାଉଛି । ସେଥିପାଇଁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଆସିଥିବା ନିମନ୍ତ୍ରଣ ପାଇବା ପରେ ସୁନାବେଡ଼ା ଗ୍ରାମର ଯୁବରାଜ ଛତ୍ରିଆ ଏବଂ ତାଙ୍କ ପତ୍ନୀ ଆସମତି ଛତ୍ରିଆ ଦିଲ୍ଲୀ ଯାତ୍ରା କରୁଛନ୍ତି । ଅଭୟାରଣ୍ୟର ଅଧିଷ୍ଠାତ୍ରୀ ଦେବୀ ମା’ ସୁନାଦେଈଙ୍କ ପରମ୍ପରାରେ ବିଶ୍ବାସୀ ହୋଇଥିବାରୁ ଅଖ୍ୟାତ ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ ସେମାନେ ଖାଲି ପାଦରେ ଯାତ୍ରା କରୁଛନ୍ତି । ଦିଲ୍ଲୀ ଯିବାପାଇଁ ଏହି ନିମନ୍ତ୍ରଣ ପାଇଥିବାରୁ ଯୁବରାଜ ଓ ତାଙ୍କ ପତ୍ନୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କୃତଜ୍ଞତା ଜଣାଇଛନ୍ତି ।
ସେମିତି ଆଉ ଜଣେ ହେଲେ କୋରାପୁଟ ଜିଲ୍ଲା କୋଟପାଡ଼ ବ୍ଲକ ଚାନ୍ଦିଲି ଗ୍ରାମ ପଞ୍ଚାୟତ ଅନ୍ତର୍ଗତ ପିରଞ୍ଜି ଗ୍ରାମର ଜଣେ ଜବ୍କାର୍ଡଧାରୀ ଶ୍ରମିକ ଅକ୍ଷୟ ଜୟଫୁଲ । ପତ୍ନୀ ରେଣୁକା ରାଣୀ ମଧ୍ୟ ଜବ୍ କାର୍ଡଧାରୀ ଶ୍ରମିକ । ଚାନ୍ଦିଲି ଗ୍ରାମ ପଞ୍ଚାୟତରେ ୨୦୨୨-୨୩ ଆର୍ଥିକ ବର୍ଷରେ ୧୦ଲକ୍ଷ ଟଙ୍କା ବ୍ୟୟରେ ଖନନ କରାଯାଇଥିଲା ଏକ ଅମୃତ ସରୋବର । ମନରେଗା ଯୋଜନାରେ ଜବ୍କାର୍ଡଧାରୀ ଶ୍ରମିକ ଭାବେ କାର୍ଯ୍ୟ କରିବାର ସୁଯୋଗ ପାଇଥିଲେ ଅକ୍ଷୟ । ତେବେ ମିଶନ ଅମୃତ ସରୋବର ଯୋଜନାରେ କାର୍ଯ୍ୟ କରିବାରେ ତାଙ୍କର ନିଷ୍ଠା ଓ ସହଯୋଗ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା । ଚଳିତବର୍ଷ ନୂଆଦିଲ୍ଲୀଠାରେ ଆୟୋଜିତ ସ୍ବାଧୀନତା ଦିବସ ଉତ୍ସବରେ ଯୋଗ ଦେବାକୁ ଅକ୍ଷୟଙ୍କୁ ମିଳିଛି ଆମନ୍ତ୍ରଣ । କେନ୍ଦ୍ର ଗ୍ରାମୀଣ ବିକାଶ ମନ୍ତ୍ରଣାଳୟର ମହାତ୍ମା ଗାନ୍ଧୀ ନରେଗା ଡିଭିଜନ ପକ୍ଷରୁ ସେ ବିଶେଷ ଭାବେ ଆମନ୍ତ୍ରିତ ହୋଇ ନିଜ ପତ୍ନୀ ରେଣୁକାଙ୍କ ସହ ଦିଲ୍ଲୀ ଯାତ୍ରା କରିଛନ୍ତି । ଜଣେ ଦିନମଜୁରିଆ ଭାବେ ଅମୃତ ସରୋବର ଯୋଜନାରେ ସାମିଲ ହୋଇ ନୂଆଦିଲ୍ଲୀକୁ ଆମନ୍ତ୍ରିତ ହେବାରେ ସେ ଆତ୍ମହରା ହୋଇ କେନ୍ଦ୍ର ସରକାରଙ୍କୁ ଆଶେଷ କୃତଜ୍ଞତା ଜଣାଇଛନ୍ତି । ଅକ୍ଷୟଙ୍କୁ ଏଭଳି ନିମନ୍ତ୍ରଣ ମିଳିଥିବାରୁ ତାଙ୍କ ପରିବାର ଏବଂ ଗ୍ରାମବାସୀ ମଧ୍ୟ ଖୁସିବ୍ୟକ୍ତ କରିଛନ୍ତି ।
ସୁବର୍ଣ୍ଣପୁର ଜିଲ୍ଲାର ସନ୍ତୋଷିନୀ ମିଶ୍ର ଜଣେ ସଫଳ ଜୈବିକ ଚାଷୀ ଭାବେ ବେଶ୍ ପରିଚିତ । ଦୀର୍ଘ ୭ ବର୍ଷ ଧରି ସେ ନିଜର ୭ ଏକର ପରିମିତ ଚାଷ ଜମିରେ ଜୈବିକ ପ୍ରଣାଳୀରେ ସମନ୍ବିତ ଚାଷ କରି ଆସୁଛନ୍ତି । ନିଜ ଫସଲରେ ଜୀବାମୃତ ସହିତ ବୁନ୍ଦା ଜଳସେଚନର ବ୍ୟବସ୍ଥା କରି ସେ ପୋଟଳ, ବାଇଗଣ ଆଦି ପନିପରିବା ଉତ୍ପାଦନ କରୁଛନ୍ତି । ଉଭୟ ଖରିଫ ଓ ରବି ଋତୁରେ ପନିପରିବା ଚାଷ କରି ନିଜକୁ ଆତ୍ମନିର୍ଭରଶୀଳ କରିପାରିଛନ୍ତି । ନିଜ କ୍ଷେତରୁ ଉତ୍ପାଦିତ ଫସଲକୁ କ୍ଷେତ୍ରପାଳ କୃଷକ ଉତ୍ପାଦକ ସଂଘ ମାଧ୍ୟମରେ ବିକ୍ରୟ କରୁଛନ୍ତି । ତାଙ୍କ ଏହି ଜୈବିକ ଚାଷ ଅନ୍ୟଙ୍କୁ ପ୍ରେରଣା ଯୋଗାଇ ଆସୁଛି । ଚଳିତବର୍ଷ ନୂଆଦିଲ୍ଲୀଠାରେ ଆୟୋଜିତ ସ୍ବାଧୀନତା ଦିବସ ଉତ୍ସବରେ ଯୋଗ ଦେବାଲାଗି ସନ୍ତୋଷିନୀଙ୍କୁ କେନ୍ଦ୍ର ସରକାରଙ୍କ ପକ୍ଷରୁ ମିଳିଛି ନିମନ୍ତ୍ରଣ । ଜଣେ ସଫଳ ଚାଷୀ ଭାବେ ସରକାରଙ୍କ ଏହି ସ୍ବୀକୃତି ଏବଂ ଆମନ୍ତ୍ରଣକୁ ଏକ ଗର୍ବ ଓ ଗୌରବର କଥା ବୋଲି କହିଛନ୍ତି ସନ୍ତୋଷିନୀ । ଏଥିପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କୃତଜ୍ଞତା ଜଣାଇଛନ୍ତି ।