ଟ୍ରାକସୁଟ, ସ୍ପୋର୍ସ ଜୋତା ଆଉ ବେକରେ ତିନି ନିନୋଟି ପଦକ । ମଙ୍ଗଳବାର ଯିଏ କେହି ବି ଦିଲ୍ଲୀ(delhi) ଏୟାରପୋର୍ଟରେ 94 ବର୍ଷୀୟ ଭଗବାନୀ ଦେବୀଙ୍କୁ ଦେଖିଛି, ସେ ଆଶ୍ଚର୍ଯ୍ୟ ହୋଇଯାଇଛି । ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଥିଲା ଯେ 94 ବର୍ଷ ବୟସ୍କା ଏହି ମହିଳାଙ୍କୁ ନେଇ ଯେଉଁ ଚର୍ଚ୍ଚା ହେଉଛି ସେ ପ୍ରକୃତରେ କିଏ ?
94 ବର୍ଷର ଦାଦି ଭଗବାନୀ ଦେବୀ ଫିନଲାଣ୍ଡରେ ଭାରତକୁ ଗୌରବାନ୍ବିତ କରିଛନ୍ତି । ବୟସର ଅପରାହ୍ନରେ ଯେବେ ସମସ୍ତେ ପାଦେ ଚାଲିବାକୁ ଅସମର୍ଥ ଥାନ୍ତି, ସେହି ସମୟରେ ଭଗବାନୀ ଦେବୀ ଦିଲ୍ଲୀରୁ ବାହାରି ଫିନଲାଣ୍ଡରେ ପହଞ୍ଚିଛନ୍ତି ।
ନଜଫଗଡ ସ୍ଥିତ ମଲିକପୁର ଗାଁରେ ରହୁଥିବା ଦାଦି ଫିନଲାଣ୍ଡ ଯାଇ ଓ୍ବର୍ଲଡ ମାଷ୍ଟର୍ସ ଆଥଲେଟିକ୍ସ ଚମ୍ପିଆନସିପରେ ଭାଗ ନେଇଥିଲେ । ଏଥିରେ ସେ ଗୋଟିଏ ନୁହେଁ, ବରଂ ତିନି ତିନୋଟି ପଦକ ଜିତିଛନ୍ତି । ଏଥିରେ 100 ମିଟର ଦୌଡରେ ସ୍ବର୍ଣ୍ଣ ପଦକ, ଡିସ୍କସ ଥ୍ରୋ ଓ ଗୋଳାଫିଙ୍ଗାରେ କାଂସ୍ୟ ପଦକ ଜିଥିଛନ୍ତି । 90ରୁ 94 ବର୍ଷ ବର୍ଗରେ ହୋଇଥିବା ପ୍ରତିଯୋଗିତାରେ ଏହି ପଦକ ହାସଲ କରିଛନ୍ତି ଦାଦି ।
100 ମିଟର ଦୌଡରେ ଦାଦି ଭଗବାନୀ ଦେବି 24,74 ସେକେଣ୍ଡରେ ପୁରା କରିଥିଲେ । ବିଶ୍ବର ସବୁଠୁ ଦ୍ରୁତ ଧାବକ ଉସେନ ବୋଲ୍ଟ 100 ମିଟର ଦୌଡ 9.58 ସେକେଣ୍ଡରେ ପୁରା କରି ରେକର୍ଡ କରିଥିଲେ । ଏହା ଆଜି ଯାଏଁ ବିଶ୍ବ ରେକର୍ଡ ହୋଇ ରହିଛି ।
ଦାଦିଙ୍କ ପ୍ରଥମ ପସନ୍ଦ ଥିଲା କବାଡି । ପିଲାଦିନେ ସେ ଏହି ଖେଳକୁ ବହୁତ ପସନ୍ଦ କରୁଥିଲେ । ଏହା ପରେ ଜୀବନର ଉତ୍ଥାନ-ପତନରେ ସେ କବାଡିରୁ ଦୂରେଇ ଯାଇଥିଲେ। ଭଗବାନୀ ଦେବୀ 29 ବର୍ଷ ବୟସରେ ନିଜ ସ୍ୱାମୀଙ୍କୁ ହରାଇଲେ । ଏହା ପରେ ତାଙ୍କର 11 ବର୍ଷର ଝିଅ ମଧ୍ୟ ତାଙ୍କୁ ସବୁଦିନ ପାଇଁ ଛାଡି ଚାଲିଗଲେ । ସେତେବେଳେ ଭଗବାନୀଙ୍କ ଏକମାତ୍ର ସାହାରା ଥିଲା ତାଙ୍କ ପୁଅ ହୱା ସିଂ। ପରେ ଧିରେ ଧିରେ ଦାଦି ନିଜ ଜୀବନକୁ ସମ୍ଭାଳିଥିଲେ ।
ଦାଦି ଫିନଲାଣ୍ଡରେ ପହଞ୍ଚିବାରେ ନାତି ବିକାଶ ଡଗରଙ୍କର ବଡ଼ ସମର୍ଥନ ରହିଛି । କେବଳ ଛଅ ମାସର ପରିଶ୍ରମ ଦାଦିଙ୍କୁ ଏହି ସଫଳତା ଦେଇଛି । ଭଗବାନୀ ଦେବୀ ନାତିଙ୍କ ସହ ଅଭ୍ୟାସ କରିବାକୁ ଷ୍ଟାଡିୟମ ଯିବାକୁ ଲାଗିଲେ। ଦାଦିଙ୍କ ନିଷ୍ଠାକୁ ଦେଖି ନାତି ପ୍ରତିଯୋଗିତାରେ ତାଙ୍କ ନାମ ରେଜିଷ୍ଟ୍ରେସନ କରିଥିଲେ । ତା’ପରେ ଚଳିତ ବର୍ଷ ମେ ମାସରେ, ଦିଲ୍ଲୀ ଷ୍ଟେଟ ମାଷ୍ଟର୍ସ ଚାମ୍ପିଅନସିପରେ ସେ ତାଙ୍କ ବୟସ ବର୍ଗରେ ତିନୋଟି ସ୍ୱର୍ଣ୍ଣ ପଦକ ଜିତିଥିଲେ । ଏହାପରେ ପିନଲାଣ୍ଡ ଯାଇ ସମାନ ଖେଳରେ ଭାଗ ନେଇ ସ୍ବର୍ଣ୍ଣ ଜିତିଛନ୍ତି ।