Crocodile
ଭିତରକନିକା ଜାତୀୟ ଉଦ୍ୟାନରେ ଚଳିତ ବର୍ଷର କୁମ୍ଭୀର ଗଣନା କାର୍ଯ୍ୟ ଶେଷ ହୋଇଛି l ଏ ସମ୍ପର୍କରେ ସ୍ଥାନୀୟ ଡିଭିଜନାଲ ଫରେଷ୍ଟ ଅଫିସର (DFO), ଶ୍ରୀଯୁକ୍ତ ଜେ. ଡି. ପତି ସୂଚନା ଦେଇ କହିଛନ୍ତି ଯେ, ଚଳିତ ବର୍ଷ ଅଭୟାରଣ୍ୟରେ ୨୫୦୦ ନୂତନ କୁମ୍ଭୀର ଶାବକ ଜନ୍ମ ନେଇଛନ୍ତି l ଚଳିତ ବର୍ଷ ୮୪ଟି କୁମ୍ଭୀର ଅଣ୍ଡା ଦେଉଥିବା ସ୍ଥଳ ଠାବ କରାଯାଇଥିଲା l ଅଭୟାରଣ୍ୟ ମଧ୍ୟରେ ୨୦୦୦ ମସିହାରେ ୧୦୩ ଗୋଟି ଅଣ୍ଡା ଦେବା ସ୍ଥାନ ଠାବ କରାଯାଇଥିଲା ଏବଂ ୩୦୦୦ ନୂତନ କୁମ୍ଭୀର ଛୁଆ ଜନ୍ମ ଗ୍ରହଣ କରିଥିଲେ l ଚଳିତ ବର୍ଷର ୟାସ ବାତ୍ୟା ଯୋଗୁଁ ଅନେକ କୁମ୍ଭୀର ବସା ଜଳରେ ନଷ୍ଟ ହୋଇଯାଇଛି l ସେହି କାରଣରୁ କୁମ୍ଭୀର ଛୁଆମାନଙ୍କ ସଂଖ୍ୟାରେ ଯଥେଷ୍ଟ ହ୍ରାସ ଘଟିଛି ବୋଲି ଶ୍ରୀଯୁକ୍ତ ପତି ଜଣାଇଛନ୍ତି l ଜାନୁଆରୀ ୨୦୧୧ କୁମ୍ଭୀର ଗଣନା ଅନୁସାରେ, ଭିତରକନିକା ଅଭୟାରଣ୍ୟରେ ମୋଟ ୧,୭୬୮ଟି ଲୁଣା କୁମ୍ଭୀର ରହିଛନ୍ତି l
ସାଧାରଣତଃ ଅଣ୍ଡା ଦେବା ଋତୁରେ କୁମ୍ଭୀର ମାନେ ଉଚ୍ଚ ସ୍ଥାନଗୁଡ଼ିକରେ ମାଟି, କାଦୁଅ, ଘାସ, ହେନ୍ତାଳ କାଠି ଏକାଠି କରି ତାହା ମଧ୍ୟରେ ଅଣ୍ଡା ଦେଇଥାଆନ୍ତି l ମେ ଏବଂ ଜୁନ ମାସରେ ଏହି ପ୍ରକ୍ରିୟା ଚାଲିଥାଏ l ଯାହା ଦ୍ୱାରା ଅଣ୍ଡାଗୁଡ଼ିକ ସିଧାସଳଖ ସୂର୍ଯ୍ୟକିରଣ ପାଇବା ସଙ୍ଗେ ସଙ୍ଗେ ଜଳ ସ୍ପର୍ଶରେ ଆସନ୍ତି ନାହିଁ l ଏହି ପରି ଭାବରେ ୭୦ ରୁ ୮୦ ଦିନ ମଧ୍ୟରେ ଅଣ୍ଡା ଗୁଡ଼ିକରୁ ଛୁଆ ଫୁଟି ବାହାରି ଥାଆନ୍ତି l ଗୋଟିଏ ମା କୁମ୍ଭୀର ଗୋଟିଏ ବସାରେ ପ୍ରାୟ ୪୦ ରୁ ୭୦ଟି ପର୍ଯ୍ୟନ୍ତ ଅଣ୍ଡା ଦେଇଥାଏ l ସେଥି ମଧ୍ୟରୁ ୪୦% ରୁ ୫୦% ପ୍ରତିଶତ ଛୁଆ ଫୁଟି ବାହାରି ଥାଆନ୍ତି l ଏକ ହିସାବରୁ ଜଣାପଡିଛି ଯେ, ୫୦୦ଟି ଅଣ୍ଡା ମଧ୍ୟରୁ ଛୁଆଗୁଡ଼ିକ ବାହାରି ସାରିବା ପରେ ବିଭିନ୍ନ ବାଧା ବିଘ୍ନ ଏବଂ ପ୍ରତିକୂଳ ପରିବେଶ ମଧ୍ୟରେ କେବଳ ଗୋଟିଏ ବୟସ୍କ କୁମ୍ଭୀର ତିଷ୍ଠି ରହିଥାଏ l
Share your comments