କୃଷି ଆଇନକୁ ବିରୋଧ କରି ଜାରି ରହିଥିବା ଆନ୍ଦୋଳନ ଖୁବ୍ ଶୀଘ୍ର ଶେଷ ହେବ। SKM (ସଂଯୁକ୍ତ କିଷାନ ମୋର୍ଚ୍ଚା) ଆସନ୍ତାକାଲି ଏନେଇ ଚୂଡ଼ାନ୍ତ ନିଷ୍ପତ୍ତି ନେବ । ଆଜି ସିଂଘୁ ଏବଂ ଦିଲ୍ଲୀ ସୀମାରେ ଏସକେମ୍ର ଚାଷୀ ନେତାମାନଙ୍କର ଏକ ବୈଠକ ହୋଇଥିଲା । କିନ୍ତୁ ବୈଠକରେ କୌଣସି ପରିଣାମ ବାହାରି ପାରିନି ଏବଂ ଆସନ୍ତାକାଲି ଅପରାହ୍ନ ୨ ଟାରେ ପୁଣି ବୈଠକ ହେବ । ଏସକେଏମ୍ର ପ୍ରମୁଖ ନେତାମାନେ ବୈଠକରେ ଯୋଗ ଦେବେ ।
ତିନି ବିବାଦୀୟ କୃଷି ଆଇନ ପ୍ରତ୍ୟାହାର (Farm Laws Repeal) ପରେ କୃଷକମାନଙ୍କ ଅବଶିଷ୍ଟ ଦାବି ପୂରଣ ପାଇଁ ସଂଯୁକ୍ତ କିଷାନ ମୋର୍ଚ୍ଚା ଦ୍ବାରା ୫ ଜଣିଆ କମିଟିକୁ କେନ୍ଦ୍ର ସରକାର ଲିଖିତ ପ୍ରସ୍ତାବ ଦେଇଛନ୍ତି । ଏହାପରେ ଆନ୍ଦୋଳନ ବନ୍ଦ କରିବା ନେଇ ବିଚାର ବିମର୍ଶ କରାଯାଉଛି । କେନ୍ଦ୍ର ସରକାର ସର୍ବନିମ୍ନ ସହାୟକ ମୂଲ୍ୟ (ଏମସିପି) ଉପରେ ଆଇନଗତ ଗ୍ୟାରେଣ୍ଟି ପ୍ରଦାନ ପାଇଁ ଲିଖିତ ପ୍ରତିଶ୍ରୁତି ଦେବାକୁ ସମ୍ମତି ପ୍ରକାଶ କରିଛନ୍ତି । କୌଣସି ରାଜିନାମା ବିନା ଆନ୍ଦୋଳନ ପ୍ରତ୍ୟାହାର କରିବା ଉପରେ ନିଷ୍ପତ୍ତି ହୋଇନାହିଁ ।
ବିକେୟୁ ନେତା ରାକେଶ ଟିକାୟତ କହିଛନ୍ତି, କେନ୍ଦ୍ର ସରକାର କିଛି ପ୍ରସଙ୍ଗ ଉପରେ ସଠିକ୍ ଦିଗଦର୍ଶନ କରିନାହାନ୍ତି । ସରକାର କହିଛନ୍ତି, ଆନ୍ଦୋଳନ ଶେଷ ହେଲେ ମାମଲା ପ୍ରତ୍ୟାହାର ହେବ ।
ଏମ୍ଏସପି ପ୍ରସଙ୍ଗରେ ଆଲୋଚନା ପାଇଁ ସରକାର ଏକ କମିଟି ଗଠନ ପାଇଁ ଚାହୁଛନ୍ତି । ଏହି କମିଟିରେ ଏସକେଏମ୍ର ପ୍ରତିନିଧି ରହିବେ । କେନ୍ଦ୍ର ସରକାର ମଧ୍ୟ କହିଛନ୍ତି ଯେ, ଆନ୍ଦୋଳନ ପ୍ରତ୍ୟାହାର କରିବାପରେ ହିଁ ଉତ୍ତରପ୍ରଦେଶ ଏବଂ ହରିୟାଣା ସରକାର କୃଷକଙ୍କ ବିରୋଧରେ ଥିବା ମାମଲା ପ୍ରତ୍ୟାହାର କରିବେ । ସେହିପରି ଆନ୍ଦୋଳନରେ ପ୍ରାଣ ହରାଇଥିବା କୃଷକଙ୍କ ପରିବାର ସଦସ୍ୟଙ୍କୁ ସରକାର କ୍ଷତିପୂରଣ ଦେବାପାଇଁ ସରକାର ରାଜି ଅଛନ୍ତି ବୋଲି କୁହାଯାଇଛି ।
୨୦୨୦ ସେପ୍ଟେମ୍ବରେ କେନ୍ଦ୍ର ସରକାର ୩ ବିବାଦୀୟ କୃଷି ଆଇନ ଆଣିଥିଲେ । ସେବେଠଉ କୃଷକମାନେ ଏହାକୁ ବିରୋଧ କରି ପ୍ରତ୍ୟାହାର ଦାବିରେ ଅଡି ବସିଥିଲେ । ପାଖାପାଖି ବର୍ଷେ ହେବ ସିଙ୍ଘୁ ସୀମାରେ ଆନ୍ଦୋଳନ ଚଳାଇଛନ୍ତି ଚାଷୀ । ଗତ ନଭେମ୍ବର ୧୯ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୃଷି ଆଇନକୁ ପ୍ରତ୍ୟାହାର କରିବା ପାଇଁ ଘୋଷଣା କରିଥିଲେ । ଏହାପରେ ସଂସଦ ଶୀତ ଅଧିବେଶନର ପ୍ରଥମ ଦିନରେ ଏ ସମ୍ପର୍କିତ ବିଲ ପାରିତ ହୋଇଥିଲା ।