ଅଣ-ଧାନ ଫସଲ ସମ୍ପର୍କରେ ସୁବର୍ଣ୍ଣପୁର ଜିଲ୍ଲାର କୃଷକମାନଙ୍କୁ ସୂଚନା

ଅଣ-ଧାନ ଫସଲ ପ୍ରତି ଚାଷୀମାନେ କିପରି ଅଧିକ ଆଗ୍ରହ ପ୍ରକାଶ କରିବେ ଏବଂ ଧାନ ଫସଲ ବଦଳରେ ଅଣ-ଧାନ ଫସଲରୁ କିପରି ଭଲ ରୋଜଗାର କରିପାରିବେ ସେ ସମ୍ପର୍କରେ ସରକାରୀ ସ୍ତରରେ ସମସ୍ତ ପ୍ରଚେଷ୍ଟା ଚାଲୁ ରହିଛି l ସମୟ ସମୟରେ ପାଣିପାଗରେ ପରିବର୍ତ୍ତନ ଯୋଗୁଁ ଧାନ ଚାଷରେ ବାଧା ଘଟିଥାଏ ଏବଂ ଚାଷୀ ଅଧିକ କ୍ଷତିର ସାମ୍ନା କରନ୍ତି l ଏହି କ୍ଷତିକୁ ଭରଣା କରିବା ପାଇଁ ଚାଷୀମାନଙ୍କୁ ଅଧିକରୁ ଅଧିକ ପରିମାଣରେ ଅଣ-ଧାନ ଫସଲ କରିବାକୁ ପ୍ରୋତ୍ସାହନ ପ୍ରଦାନ କରାଯାଉଛି l

ଗତ ମାସରେ ବର୍ଷାର ପରିମାଣ ବହୁତ କମ ରହିଥିବାରୁ ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ଠାରେ ଅଣ-ଧାନ ଚାଷକୁ ଉତ୍ସାହିତ କରିବା ପାଇଁ ଗୁରୁବାର ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ଉପଜିଲ୍ଲାପାଳ ଅଶୋକ ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଉପଖଣ୍ଡର ଦୁଇଟି ବ୍ଲକ୍‌ ବୀରମହାରାଜପୁର ଓ ଉଲୁଣ୍ଡାରେ ମରୁଡ଼ି ପରିସ୍ଥିତି ସୃଷ୍ଟି ହେଲେ ତାହାର ମୁକାବିଲା ପାଇଁ ଅଣଧାନ ଚାଷକୁ ଗୁରୁତ୍ବ ଦେବା ଉପରେ ଆଲୋଚନା ହୋଇଥିଲା। ଏଥିପାଇଁ ପ୍ରଶାସନିକ ସ୍ତରରେ ଏବେଠୁ ପ୍ରସ୍ତୁତ  ହେବାକୁ ପଡ଼ିବ ବୋଲି ଉପ-ଜିଲ୍ଲାପାଳ କହିଥିଲେ। ଏଥିପାଇଁ ବୀରମହାରାଜପୁର ବ୍ଲକ୍‌ ଜଟେସିଙ୍ଘା ପଞ୍ଚାୟତର ମୁଣ୍ଡିଦମକ ଓ ମୁର୍ଷୁଣ୍ଢୀ ପଞ୍ଚାୟତର ଯୁବରାଣୀସୀତାପୁର ଦୁଇଟି ଗ୍ରାମର ଚାଷୀମାନଙ୍କୁ ଅଣଧାନ ଚାଷ ସଂପର୍କର ବିଭିନ୍ନ ବିଭାଗର ଅଧିକାରୀମାନେ ଅବଗତ କରିବେ।

ସେହିପରି ଉଲୁଣ୍ଡା ବ୍ଲକ୍‌ ଅନ୍ତର୍ଗତ ପଞ୍ଚମହଲା ପଞ୍ଚାୟତର ଡିଡିମାଲ ଓ ଉଲୁଣ୍ଡା ପଞ୍ଚାୟତର ଖଲିଆପାଲି ଗାଁରେ ସଚେତନତା ବୈଠକ କରାଯିବା ପାଇଁ ନିଷ୍ପତି ନିଆଯାଇଛି l ଏଥିରେ କୃଷି, ଉଦ୍ୟାନ, ଜଙ୍ଗଲ, କୃଷି ଓ ସମବାୟ ବିଭାଗ, ଓଡ଼ିଶା ଜୀବିକା ମିଶନ, ଜଳସେଚନ ଓ ଉଠା ଜଳସେଚନ ବିଭାଗ ସହିତ ରାଜସ୍ବ ବିଭାଗ ଏବଂ ଅନ୍ୟାନ୍ୟ ସମସ୍ତ ବିଭାଗର ଉଚ୍ଚ କର୍ତ୍ତୃପକ୍ଷ ଉପସ୍ଥିତ ରହିବେ ବୋଲି ଉପଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି। ଆଜିର ଏହି ବୈଠକରେ ଜିଲ୍ଲା କୃଷି ଅଧିକାରୀ ପ୍ରମିଳା ସ୍ବାଇଁ, ଏଆର୍‌ସିଏସ୍ ପତଞ୍ଜଳି ମିଶ୍ର, ଉଲୁଣ୍ଡା କୃଷି ବିଭାଗ ଅଧିକାରୀ ଲକ୍ଷ୍ମୀ ପ୍ରସାଦ ପାତ୍ର, ବୀରମହାରାଜପୁର କୃଷି ଅଧିକାରୀ କାଳିନ୍ଦୀ ପରିଡ଼ା, ସହକାରୀ ଉଦ୍ୟାନକୃଷି  ନିର୍ଦ୍ଦେଶକ ବିଦ୍ୟାଧର ଦାସ, ବୀରମହାରାଜପୁର ସହସିଏଦାର ବିଜ୍ଞାନ କୁମ୍ଭାର, ବୀରମହାରାଜପୁର ବିଡ଼ିଓ ମୋତିଲାଲ ସୁଲିଆ, ନିୟନ୍ତ୍ରିତ ବଜାର କମିଟିର ସମ୍ପାଦକ କିଶୋର ନାୟକ, ପ୍ରିୟଙ୍କା ବେହେରା ଓ ବଳଭଦ୍ର ନାୟକଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।