ଓଡିଶା ଉପରେ ପ୍ରକୃତିର କୋପଦୃଷ୍ଟି ପଡିଛି । ରାଜ୍ୟରେ ଦିନକୁ ଦିନ ଗ୍ରୀଷ୍ମ ପ୍ରବାହ (Heat Wave)ବୃଦ୍ଧି ପାଉଥିବା ବେଳେ ଆଗକୁ ବାତ୍ୟା (Cyclone) ଆଶଙ୍କା ରହିଛି ।
ଗତ କିଛି ଦିନ ହେଲା ରାଜ୍ୟରେ ପାଗ ଶୁଖିଲା, ଖରାଟିଆ ଓ ଆକାଶ ମେଘ ମୁକ୍ତ ରହୁଛି । ଖୁବଶୀଘ୍ର ଗ୍ରୀଷ୍ମ ପ୍ରବାହ ଆରମ୍ଭ ହେବ। ୧୬ ତାରିଖରୁ ରାଜ୍ୟରେ ଖରା (Hot)ର ପ୍ରକୋପ ବୃଦ୍ଧି ପାଇବ । ତେବେ ମାର୍ଚ୍ଚରେ ପୁଣି ବାତ୍ୟା (Cyclone) ହୋଇପାରେ ବୋଲି ପୂର୍ବାନୁମାନ କରାଯାଉଛି ।
ଆଞ୍ଚଳିକ ପାଣିପାଗ ବିଭାଗର ସୂଚନା ଅନୁସାରେ ହିଁ, ଆସନ୍ତା ୧୬ ତାରିଖରୁ ଆଗାମୀ ୩ ଦିନ ଯାଏଁ ବଲାଙ୍ଗିର ଜିଲ୍ଲା, ସୋନପୁର ଜିଲ୍ଲା, ବୌଦ୍ଧ ଜିଲ୍ଲା ଓ ଅନୁଗୁଳ ଜିଲ୍ଲାର କିଛି ସ୍ଥାନରେ ଗ୍ରୀଷ୍ମ ଲହରୀ ବା ହିଟ୍ ୱେଭ୍ (Heat Wave) ହେବାର ସମ୍ଭାବନା ରହିଛି ।
୧୭ ତାରିଖରେ ବଲାଙ୍ଗିର ଜିଲ୍ଲା, ସୋନପୁର ଜିଲ୍ଲା, ବୌଦ୍ଧ ଜିଲ୍ଲା ଓ ଅନୁଗୁଳ ଜିଲ୍ଲା ସମେତ ନୟାଗଡ଼ ଜିଲ୍ଲା ଓ ଖୋର୍ଦ୍ଧା ଜିଲ୍ଲାରେ ମଧ୍ୟ ଗ୍ରୀଷ୍ମ ପ୍ରବାହର ହୋଇପାରେ । ତେଣୁ ଏହି ଜିଲ୍ଲାଗୁଡ଼ିକ ପାଇଁ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ୟେଲୋ ୱାର୍ଣ୍ଣିଂ (yellow warning)ଜାରି କରିଛି ।
ଦକ୍ଷିଣ ପଶ୍ଚିମ ଓଡ଼ିଶାରେ ଅପେକ୍ଷାକୃତ ଅଧିକ ଗରମ ହେବ । ଆସନ୍ତା ୫ ଦିନ ଯାଏଁ ପାଗ ଏପରି ରହିବ । ବର୍ତ୍ତମାନ ରାଜ୍ୟର ସର୍ବାଧିକ ତାପମାତ୍ରା ୩୭ ଡିଗ୍ରି ଉପରେ ରହୁଥିବା ବେଳେ ଆସନ୍ତା ୨ ଦିନ ଭିତରେ ଆଉ ୩ ଡିଗ୍ରୀ ପର୍ଯ୍ୟନ୍ତ ଦିନ ତାପମାତ୍ରା ବୃଦ୍ଧି ପାଇବାର ସମ୍ଭାବନା ରହିଛି । ସୋମବାର ୩୮.୩ ଡ଼ିଗ୍ରୀ ସହ ବଲାଙ୍ଗୀର ରାଜ୍ୟର ଉତ୍ତପ୍ତ ସହର ପାଲଟିଥିବା ବେଳେ ୧୨ ସ୍ଥାନରେ ୩୭ ଡ଼ିଗ୍ରୀ କିମ୍ବା ତାଠାରୁ ଅଧିକ ଦିନ ତାପମାତ୍ରା ରେକର୍ଡ କରାଯାଇଛି । ଭୁବନେଶ୍ୱର (BHUBANESWAR)ରେ ସର୍ବୋଚ୍ଚ ତାପମାତ୍ରା ୩୬.୬ ଡ଼ିଗ୍ରୀ ଏବଂ କଟକରେ ୩୬ ଡ଼ିଗ୍ରୀ ଥିଲା ।
ରାଜ୍ୟରେ ତାତି ବଢିଲେ ବସ ସେବା ବନ୍ଦ ହେବ । ୩୮.୩ ଡ଼ିଗ୍ରୀ ଉପରେ ଥିବା ତାପମାତ୍ରା ୪୦ ଟପିଲେ ରାଜ୍ୟରେ ସାଧାରଣ ବସ ସେବା ବନ୍ଦ କରାଯିବ ବୋଲି ରାଜ୍ୟ ପରିବହନ ସଚିବ ସୂଚନା ଦେଇଛନ୍ତି । ଗ୍ରୀଷ୍ମ ପ୍ରବାହରୁ ଲୋକଙ୍କୁ ଦୂରେଇ ରଖିବା ପାଇଁ ସରକାର ଏଭଳି ନିଷ୍ପତ୍ତି ନେଇଛନ୍ତି ।
ପ୍ରକାଶ ଥାଉ ଯେ, ସେପଟେ ମାର୍ଚ୍ଚ ୨୦ ତାରିଖ ବେଳକୁ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ପାଗ ଅନୁକୂଳ ଥିବାରୁ ଏହା ବାତ୍ୟାର ରୂପ ନେଇପାରେ । ତେବେ ଲଘୁଚାପର ଗତିବିଧି କଣ ହେବ ସେନେଇ କୌଣସି ପୂର୍ବାନୁମାନ କରାଯାଇନାହିଁ । କିନ୍ତୁ ବିଗତ ବର୍ଷରେ ମାର୍ଚ୍ଚରେ ସୃଷ୍ଟି ଘୁର୍ଣ୍ଣିଝଡ ଭାରତ ଉପକୂଳ ଛୁଇଁନାହିଁ । ତେବେ ଆସନ୍ତା ସମ୍ଭାବ୍ୟ ବାତ୍ୟା ସମ୍ପର୍କରେ ବିଧିବଦ୍ଧ ଭାବେ ଭାରତୀୟ ପାଣିପଗ କେନ୍ଦ୍ର ପକ୍ଷରୁ (IMD) କୌଣସି ସୂଚନା ଦିଆଯାଇନାହିଁ ।