ମୟୂରଭଞ୍ଜର କାଇ ଚଟଣି(red ant chutney)କୁ ମିଳିପାରେ ଭୌଗଳିକ ପରିଚୟର ମାନ୍ୟତା ଅର୍ଥାତ ଜିଆଇ ଟ୍ୟାଗ(gi tag) । ଏନେଇ ଓୟୁଏଟିକୁ(ouat) ଡେମୋନଷ୍ଟ୍ରେସନ ରିପୋର୍ଟ ମାଗିଛି କେନ୍ଦ୍ର ଆୟୁଷ ମନ୍ତ୍ରଣାଳୟ । ଯଦି ଗବେଷଣାରେ ସବୁକିଛି ଠିକ ରୁହେ, ତେବେ ଓଡିଶାର ଏହି ସ୍ବତନ୍ତ୍ର କାଇ ପିମ୍ପୁଡି ଚଟଣି ପାଇଁ ଜିଆଇ ଟ୍ୟାଗ ମାନ୍ୟତା(gi tag) ଦାବି ନେଇ ରାସ୍ତା ପ୍ରସସ୍ତ ହେବ ।
କାଇ ଚଟଣିକୁ ଜିଆଇ ଟ୍ୟାଗ ମାନ୍ୟତା ଦବା ପାଇଁ ପ୍ରୟାସ ଜୋରଶୋରରେ ଚାଲିଛି । କୃଷି ବିଜ୍ଞାନକେନ୍ଦ୍ରର ବୈଜ୍ଞାନିକମାନେ ଏଥିପାଇୱ ଆବଶ୍ୟକ ଦସ୍ତାବିଜ ପ୍ରସ୍ତୁତ କରୁଛନ୍ତି । ତେବେ ସମସ୍ତ ପ୍ରକ୍ରିୟା ଶେଷ ହେବା ପରେ କାଇ ଚଟଣିକୁ ଜିଆଇ ଟ୍ୟାଗ ମାନ୍ୟତା ଦେବା ପାଇଁ ଦାବି କରାଯିବ ।
କାଇ ଚଟଣି ନାଁ ଶୁଣିଲେ ହୁଏତ ଅନେକ ଜଣ ଆଶ୍ଚର୍ଯ୍ୟ ହୋଇଥାନ୍ତି, ହେଲେ ଏହା ମୟୁରଭଞ୍ଜ ଆଦିବାସୀ ଅଞ୍ଚଳର ଏକ ସ୍ବତନ୍ତ୍ର ଓ ସ୍ବାଦିଷ୍ଟ ଖାଦ୍ୟ ବୋଲି ବିବେଚନା କରାଯାଏ । ଶରୀର ପାଇଁ କାଇ ଚଟଣି ସ୍ବାସ୍ଥ୍ୟପ୍ରଦ ବୋଲି କୁହାଯାଏ । ଏଥିରେ ପ୍ରୋଟିନ, କ୍ୟାଲସିୟମ, ଜିଙ୍କ୍, ଭିଟାମିନ-୧୨, ପୋଟାସିୟମ, ସୋଡିୟମ ଭଳି ଅନେକ ଭିଟାମିନ ରହିଛି ।
କାଇ ପିମ୍ପୁଡିକୁ କେହି କେହି ନାଲି ପିମ୍ପୁଡି କିମ୍ବା କୁରକୁଟି କହିଥାନ୍ତି । ଏହା ଉପରେ ଅନେକ ଗବେଷଣା ଜାରି ରହିଛି । କାଇ ପିମ୍ପୁଡିକୁ ଏକାଠି କରି ସ୍ୱାଦ ଅନୁସାରେ ଲୁଣ, ରସୁଣ, ଅଦା ଓ ଲଙ୍କା ଦେଇ ଚଟଣି ପ୍ରସ୍ତୁତ କରାଯାଏ ।
ଏହା ପୂର୍ବରୁ ମହାମାରୀ କୋରୋନା ସମୟରେ ଉଠିଥିଲା କାଇ ପିମ୍ପୁଡି ଚଟଣି ମାନ୍ୟତା । କୋରୋନା ମୁକାବିଲା ପାଇଁ ଔଷଧ ଭାବେ କାଇ ପିମ୍ପୁଡି ଚଟଣିକୁ ମାନ୍ୟତା ଦେବା ପ୍ରସଙ୍ଗ ଉପରେ ନିଷ୍ପତ୍ତି ନେବାକୁ କେନ୍ଦ୍ର ଆୟୁଷ ମନ୍ତ୍ରଣାଳୟଙ୍କୁ ନିର୍ଦ୍ଦେଶ ଦେଇଥିଲେ କଟକ ହାଇକୋର୍ଟ ।
ଜଙ୍ଗଲରୁ ସଂଗ୍ରହ କରାଯାଉଥିବା କାଇ ପିମ୍ପୁଡିର ଚଟଣି ଓ ସୁପ୍ କୋରୋନା ଭୂତାଣୁ ସଂକ୍ରମଣର ମୁକାବିଲା ପାଇଁ ଔଷଧ ଭାବେ ବ୍ୟବହାର କରାଯାଇପାରିବ। କାଇ ପିମ୍ପୁଡି ଚଟଣି ଓ ସୁପ୍କୁ କୋରୋନା ଭୂତାଣୁ ସଂକ୍ରମଣ ଜନିତ ରୋଗର ଚିକିତ୍ସା ଓ ନିବାରଣ ପାଇଁ ବ୍ୟବହାର କରାଯିବାରେ କିଛି ବାଧା ନାହିଁ। କାଇ ପିମ୍ପୁଡି ଚଟଣୀ ଓ ସୁପକୁ କୋରୋନା ମୁକାବିଲା ପାଇଁ ଔଷଧ ଭାବେ ମାନ୍ୟତା ଦିଆଯିବା ଆବଶ୍ୟକ। ଏଭଳି ଦାବି ସମ୍ବଳିତ ପ୍ରସ୍ତାବ ଉପରେ ବିଚାର କରି ନିଷ୍ପତ୍ତି ନେବାକୁ କେନ୍ଦ୍ର ସରକାରଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ।