ଓଡ଼ିଶା ଏକ ଚାଷବହୁଳ ରାଜ୍ୟ l ଅଧିକାଂଶ ଲୋକ ଚାଷ ଉପରେ ନିର୍ଭର କରନ୍ତି l ରାଜ୍ୟ ସରକାର ମଧ୍ୟ ଚାଷୀଙ୍କ ପାଇଁ ବିଭିନ୍ନ ଯୋଜନା ପ୍ରଚଳିତ କରିଛନ୍ତି l ଯାହାର ଫାଇଦା ମହିଳା ଠାରୁ ଆରମ୍ଭ କରି ପୁରୁଷ ଚାଷୀ ପର୍ଯ୍ୟନ୍ତ ଉଠାଇପାରୁଛନ୍ତି l ବିଭିନ୍ନ କ୍ଷେତ୍ର ପରି ରାଜ୍ୟରେ କୃଷିର ମଧ୍ୟ ବିକାଶ ଓ କୃଷକଙ୍କ ଉନ୍ନତି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନେକ ଯୋଜନା ପ୍ରଣୟନ କରିଛନ୍ତି ।
ତେବେ କୃଷକମାନେ କିପରି ତାଙ୍କ କୃଷିଜାତ ସାମଗ୍ରୀ ବିଦେଶକୁ ରପ୍ତାନୀ କରିପାରିବେ ସେନେଇ ରାଜ୍ୟ ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ ନେଇଛନ୍ତି । ଏଣିକି କୃଷି କ୍ଷେତ୍ରରେ ଓଡ଼ିଶା ଅଧିକ ରୁ ଅଧିକ ସ୍ୱାବଲମ୍ବୀ ହେବ ସେ ନେଇ ଦୃଷ୍ଟି ଆକର୍ଷଣ କରିଛନ୍ତି ନବୀନ ସରକାର l ଏହା ସହିତ କିପରି ଚାଷୀଙ୍କ ଅମଳ ସାମଗ୍ରୀ ବିଦେଶକୁ ରପ୍ତାନୀ କରିପାରିବ ସେ ନେଇ ବାଟ କାଢିଛନ୍ତି ସରକାର । ଏଥର ବିଦେଶରେ ମିଳିବ ଓଡ଼ିଶା ଚାଷୀଙ୍କ ଅମଳ ସାମଗ୍ରୀ l
ରାଜ୍ୟରେ ଚାଷୀଙ୍କ ଦ୍ୱାରା ହେଉଥିବା କୃଷି ଓ ଉଦ୍ଭିଦଜାତ ଦ୍ରବ୍ୟ, ଫଳ ଓ ପନିପରିବା ଆଦି ରପ୍ତାନୀ ପାଇଁ ପୂର୍ବରୁ କୋଲକତା ଓ ଫରିଦାବାଦ ଉପରେ ନିର୍ଭର ହେବାକୁ ପଡ଼ୁଥିଲା । ଏଥର ଓଡ଼ିଶାରୁ କୀଟମୁକ୍ତି କୃଷିଜାତ ଦ୍ରବ୍ୟର ରପ୍ତାନୀ ସହଜ ହୋଇ ପାରିବ ବୋଲି କହିଛନ୍ତି କୃଷି ସଚିବ। ଆଲୋଚ୍ୟ ବିଷୟ ଯେ ବିଭିନ୍ନ ଦେଶକୁ କୀଟମୁକ୍ତ ରପ୍ତାନୀ କରିବା ପାଇଁ କୃଷିଜାତ ଦ୍ରବ୍ୟର ‘ଫାଇଟୋ ସାନିଟାରୀ ସାର୍ଟିଫିକେଟ’ ଆବଶ୍ୟକତା ପଡ଼େ । ତେବେ ରପ୍ତାନୀ ହେଉଥିବା କୃଷିଜାତ ଦ୍ରବ୍ୟର ଏହି ସାର୍ଟିଫିକେସନ ବିଶ୍ୱ ଖାଦ୍ୟ ସଂଗଠନ ଅନୁଯାୟୀ କୀଟମୁକ୍ତ ବାଣିଜ୍ୟ ସୁବିଧା ନିମନ୍ତେ ଗ୍ରହଣ କରାଯାଇଛି । କୀଟମୁକ୍ତ କୃଷିଜାତ ଦ୍ରବ୍ୟର ବିଶ୍ୱ କାରବାରକୁ ଅଧିକ ରୁ ଅଧିକ ସହଜ କରିବା ପାଇଁ ବୈଷୟିକ ଦୃଷ୍ଟିରୁ ଫାଇଟୋ ସାନିଟାରୀ ସାର୍ଟିଫିକେଟର ଆବଶ୍ୟକ ପଡ଼ିଥାଏ ।
ତେବେ କୃଷିଜାତ ଦ୍ରବ୍ୟ ଓ ଉଦ୍ୟାନ କୃଷିଜାତ ଦ୍ରବ୍ୟର ରପ୍ତାନୀ ପାଇଁ ଓଡ଼ିଶା ସରକାରଙ୍କ କୃଷି ବିଭାଗ ଏହି ପ୍ରମାଣପତ୍ର ଜାରି କରିପାରିବେ । ଏନେଇ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ପକ୍ଷରୁ ଗତକାଲି ଏକ ବିଜ୍ଞପ୍ତି ପ୍ରକାଶ ପାଇଛି । କୃଷିଜାତ ସାମଗ୍ରୀର ରପ୍ତାନୀ ପାଇଁ ଆବଶ୍ୟକ ପରୀକ୍ଷଣ ଏବଂ ଯାଞ୍ଚ କରିବା ପରେ କୃଷି ନିର୍ଦ୍ଦେଶାଳୟ ଓ ଉଦ୍ୟାନ କୃଷି ନିର୍ଦ୍ଦେଶାଳୟର ଅଧିକାରୀମାନେ ଆବଶ୍ୟକ ଫାଇଟୋ ସାନିଟାରୀ ସାର୍ଟିଫିକେଟ ପ୍ରଦାନ କରିପାରିବେ । ଯାହା ଚାଷୀଙ୍କ ସାମଗ୍ରୀ ବିଦେଶକୁ ଯିବା ପାଇଁ ସକ୍ଷମ କରାଇବ l