ସରିଲା NITI Aayog ବୈଠକ, କଣ କହିଲେ ପ୍ରଧାନମନ୍ତ୍ରୀ?

Seventh meeting of Governing Council of NITI Aayog concludes

ନୀତି ଆୟୋଗ ପରିଚାଳନା ପରିଷଦର ସପ୍ତମ ବୈଠକ( Governing Council of NITI Aayog) ସମାପନ ହୋଇଛି । ଏହି ବୈଠକରେ ଫସଲ ବିବିଧକରଣ(crop diversification) ଏବଂ ଡାଲି, ତୈଳବୀଜ ଏବଂ ଅନ୍ୟ କୃଷି-ଉତ୍ପାଦ କ୍ଷେତ୍ରରେ ଆତ୍ମନିର୍ଭରଶୀଳତା ହାସଲ, ବିଦ୍ୟାଳୟ ଶିକ୍ଷା କ୍ଷେତ୍ରରେ ଜାତୀୟ ଶିକ୍ଷା ନୀତିNational Education Policy (NEP)ର କାର୍ଯ୍ୟକାରିତା, ଉଚ୍ଚ ଶିକ୍ଷା କ୍ଷେତ୍ରରେ ଜାତୀୟ ଶିକ୍ଷା ନୀତିର କାର୍ଯ୍ୟକାରିତା, ସହରାଞ୍ଚଳ ପ୍ରଶାସନ(urban governance) ଉପରେ ଆଲୋଚନା ହୋଇଛି ।

ବୈଠକର ଅଧ୍ୟକ୍ଷତା କରି ପ୍ରଧାନମନ୍ତ୍ରୀ କହିଛନ୍ତି, ଭାରତ କୃଷି କ୍ଷେତ୍ରରେ ଆତ୍ମନିର୍ଭରଶୀଳ ହେବା ଏବଂ ବିଶ୍ଵସ୍ତରରେ ନେତୃତ୍ୱ ନେବା ଲାଗି ଆଧୁନିକ କୃଷି, ପଶୁପାଳନ ଏବଂ ଖାଦ୍ୟ ପ୍ରକ୍ରିୟାକରଣ ଉପରେ ଗୁରୁତ୍ବାରୋପ କରିବାର ଆବଶ୍ୟକତା ରହିଛି । ସହଜ ଜୀବନଧାରଣ, ପାରଦର୍ଶୀ ସେବା ବିତରଣ ଏବଂ ସହରୀ ଭାରତର ପ୍ରତ୍ୟେକ ନାଗରିକଙ୍କ ଜୀବନ ଗୁଣବତ୍ତାରେ ସୁଧାର ଆଣିବା ଲାଗି ପ୍ରଯୁକ୍ତିର ଲାଭ ଉଠାଇବା ଦ୍ୱାରା ଦ୍ରୁତ ସହରୀକରଣ ଭାରତର ଦୁର୍ବଳତା ପରିବର୍ତ୍ତେ ସାମର୍ଥ୍ୟ ଭାବେ ଉଭା ହୋଇପାରିବ ।

ପ୍ରଧାନମନ୍ତ୍ରୀ ଏହା ମଧ୍ୟ କହିଛନ୍ତି, ପ୍ରତ୍ୟେକ ରାଜ୍ୟ ବିଶ୍ଵର ବିଭିନ୍ନ ସ୍ଥାନରେ ଥିବା ଭାରତୀୟ ମିଶନ ଜରିଆରେ ଥ୍ରୀ-ଟି- ଟ୍ରେଡ (ବାଣିଜ୍ୟ), ଟୁରିଜିମ(ପର୍ଯ୍ୟଟନ), ଟେକ୍ନୋଲୋଜି (ପ୍ରଯୁକ୍ତି)କୁ ପ୍ରୋତ୍ସାହିତ କରିବା ଉଚିତ୍‌ । ଆମଦାନୀ ହ୍ରାସ କରିବା, ରପ୍ତାନି ବଢ଼ାଇବା ଏବଂ ପ୍ରତ୍ୟେକ ରାଜ୍ୟରେ ଏଥିପାଇଁ ସୁଯୋଗକୁ ଚିହ୍ନଟ କରିବା ଲାଗି ରାଜ୍ୟମାନେ ଗୁରୁତ୍ୱ ଦେବା ଉଚିତ୍‌ । ସେ କହିଛନ୍ତି ଯେ, ଯେଉଁଠି ସମ୍ଭବ ଆମେ ସ୍ଥାନୀୟ ଉତ୍ପାଦ ବ୍ୟବହାର କରିବା ଲାଗି ଲୋକମାନଙ୍କୁ ପ୍ରୋତ୍ସାହିତ କରିବା ଆବଶ୍ୟକ । 'ଭୋକାଲ ଫର ଲୋକାଲ' ଏକ ବ୍ୟକ୍ତିଗତ ରାଜନୈତିକ ଦଳର ଲକ୍ଷ୍ୟ ନୁହେଁ ଏବଂ ଏହା ସମସ୍ତଙ୍କର ଲକ୍ଷ୍ୟ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଜିଏସଟି ସଂଗ୍ରହରେ ସୁଧାର ଆସିବା ଫଳରେ, ଆମର ସମ୍ଭାବନା ଆହୁରି ଅଧିକ ବଢ଼ିଯାଇଛି । ଜିଏସଟି ସଂଗ୍ରହ ବଢ଼ାଇବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ପ୍ରୟାସର ଆବଶ୍ୟକତା ରହିଛି । ଆମର ଆର୍ଥିକ ସ୍ଥିତିକୁ ସୁଦୃଢ଼ କରିବା ଏବଂ ଭାରତକୁ ୫ଟ୍ରିଲିୟନ ଡଲାର ଅର୍ଥବ୍ୟବସ୍ଥାରେ ପରିଣତ କରିବା ଲାଗି ଏହା ଅତ୍ୟନ୍ତ ଜରୁରି ବୋଲି ସେ କହିଥିଲେ । ଜାତୀୟ ଶିକ୍ଷା ନୀତି ଉପରେ ଆଲୋଚନା କରି ପ୍ରଧାନମନ୍ତ୍ରୀ କହିଥିଲେ ଯେ, ବ୍ୟାପକ ବିଚାରବିମର୍ଶ ପରେ ଜାତୀୟ ଶିକ୍ଷା ନୀତି ପ୍ରସ୍ତୁତ କରାଯାଇଛି । ଏହାର କାର୍ଯ୍ୟକାରିତାରେ ଆମେ ସବୁ ଅଂଶୀଦାରମାନଙ୍କୁ ସାମିଲ କରିବା ଉଚିତ୍‌ ଏବଂ ଏଥିପାଇଁ ଏକ ସ୍ପଷ୍ଟ, ସମୟବଦ୍ଧ ରୋଡମ୍ୟାପ ବିକଶିତ କରିବା ଉଚିତ୍‌ ବୋଲି ନିଜ ବକ୍ତବ୍ୟରେ କହିଛନ୍ତି ମୋଦି ।

ସେହିପରି ଶିକ୍ଷାଗତ ପରିଣାମରେ ଦୃଢ଼ ସୁଧାର, ଶିକ୍ଷକମାନଙ୍କର ସାମର୍ଥ୍ୟ ବୃଦ୍ଧି ଏବଂ କୌଶଳ ବିକାଶ ଲାଗି ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପ ସମ୍ପର୍କରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନୀତି ଆୟୋଗ ପରିଚାଳନା ପରିଷଦ ବୈଠକରେ ସୂଚନା ଦେଇଛନ୍ତି । ଏ କ୍ଷେତ୍ରରେ ସହଯୋଗ ପାଇଁ ସେ ରାଜ୍ୟମାନଙ୍କୁ ଧନ୍ୟବାଦ ଜଣାଇବା ସହିତ ଜାତୀୟ ଶିକ୍ଷାନୀତିର ସଫଳ କାର୍ଯ୍ୟକାରିତା ପାଇଁ ରାଜ୍ୟମାନଙ୍କ ଠାରୁ ଅଧିକ ସହାୟତା ପାଇଁ ଅନୁରୋଧ କରିଛନ୍ତି ପ୍ରଧାନ ।

ରବିବାର Niti Aayog ବୈଠକ, କୃଷି ଉପରେ କଣ ରହିବ ରୋଡ୍ ମ୍ୟାପ୍ ?

Agricultural Exports: କୃଷି ଉଦ୍ୟୋଗ ରପ୍ତାନିରେ 31 % ବୃଦ୍ଧି